له ئه‌نجامی زریان و بارانی به‌لێزمه كه نۆ پارێزگای باكوور و باكووری خۆرهه‌ڵاتی ئێرانی گرتووه‌ته‌وه، كه‌سێك گیانی له‌ده‌ستدا و سێی دیكه‌ش بێسه‌روشوێنن.
سه‌رۆكی دامه‌زراوه‌ی گه‌ڕان و رزگاركردن له ئێران، مورته‌زا سه‌لیمی ئاشكرایكرد بارانی به‌لێزمه و زریان كاریگه‌ریی كردووه‌ته سه‌ر ژیانی رۆژانه له نۆ پارێزگای باكوور و باكووری خۆرهه‌ڵاتی وڵاته‌كه‌ی له‌نێویشیاندا پارێزگاكانی ئازه‌ربایجانی خۆرهه‌ڵات، ئازه‌ربایجانی خۆرئاوا، ئه‌رده‌بیل، سمنان و مازنده‌ران.
مورته‌زا سه‌لیمی تیشكی خسته‌سه‌ر ئه‌وه‌ی له شاری شه‌هرودی سه‌ربه پارێزگای سمنان باكووری خۆرهه‌ڵاتی ئێران، به هۆی زریانی به‌هێز و بارانی به‌خوڕه‌وه كه دواتر بووه‌ته هۆی روودانی لافاو، كه‌سێك گیانی له‌ده‌ستداوه و سێی دیكه‌ش بێسه‌روشوێنن.
ناوبراو باسی له‌وه‌شكرد خێوه‌ت و پێداویستییان گه‌یاندووه‌ته ئه‌و ناوچانه‌ی كه لافاو و زریانی به‌هێز گرتوویه‌تییه‌وه.
کۆمێنت (0)
تا ئێستا هیچ کۆمێنتێک نەکراوە.