لوك ئۆیل كه دووه‌م گه‌وره كۆمپانیای رووسیایه، رۆژی سێشه‌ممه رایگه‌یاند: به‌هۆی نیگه‌رانییه‌كانیان له گه‌ڕاندنه‌وه‌ی سزا ئابوورییه‌كانی ئه‌مریكا بۆ سه‌ر ئێران له ئێستادا به‌نیاز نین به‌رده‌وام بن له هیچ پرۆژه‌یه‌كی به‌رهه‌مهێنان و دۆزینه‌وه‌ی نه‌وت له ناوخۆی ئێراندا.
ئاژانسی رۆیته‌رز له‌سه‌ر زاری به‌رپرسێكی كۆمپانیای لوك ئۆیل رایگه‌یاند: وێڕای له‌به‌رچاوگرتنی رووداوه‌كانی ئه‌م دواییانه، له‌م قۆناغه‌دا به‌كرده‌یی و له‌سه‌رجه‌م سێكته‌ره‌كان چالاكییه‌كانیان له ئێران راگرتووه.
مانگێك له‌مه‌وبه‌ر ئاژانسی سپۆتنیكی رووسی بڵاوی كردبۆوه كۆمپانیای لوك ئۆیل بۆ په‌ره‌پێدانی ناوچه‌كه‌ی نه‌وتی مه‌نسووری و چه‌نگوله له‌گه‌ڵ ئێران رێككه‌وتنی نوێ واژۆده‌كات.
به‌ڵام له ماوه‌ی رابردوو چه‌ندین كۆمپانیا كه زۆربه‌یان ئه‌وروپی بوون له‌وانه‌ش كۆمپانیای تۆتاڵ رایانگه‌یاند: به‌هۆی مه‌ترسی له دووباره سه‌پاندنه‌وه‌ی سزا ئابوورییه‌كانی ئه‌مریكا به‌سه‌ر ئێراندا، چالاكیه‌كانی خۆیان له ئێران راده‌گرن.
دۆناڵد ته‌رمپ سه‌رۆك كۆماری ئه‌مریكا سێ هه‌فته له‌مه‌وبه‌ر رایگه‌یاند: به‌هۆی پابه‌ند نه‌بوون به ناوه‌ڕۆكی رێككه‌وتنی ئه‌تۆمی وڵاتانی پێنج كۆ یه‌ك، ویلایه‌ته یه‌كگرتووه‌كانی ئه‌مریكا له رێكه‌وتنه‌كه ده‌كشێته‌وه و هاوكات سزا ئابوورییه‌كانی تووندی وڵاته‌كه‌ی به‌سه‌ر ئێران و سه‌رجه‌م ئه‌و كۆمپانیایانه دا ده‌سه‌پێنێت كه له‌گه‌ڵ ئێران كاری بازرگانی ده‌كه‌ن.
کۆمێنت (0)
تا ئێستا هیچ کۆمێنتێک نەکراوە.