وەزارەتی پەروەردە و تەندروستی حکوومەتی هەرێمی کوردستان لە ڕاگەیاندراوێکدا ئەنجامی کۆبوونەوەکەی ئەمڕۆ پێنجشەممە لەگەڵ وەزارەتی پلاندانانی حکوومەتی عێراق خستە ڕوو، كه ئه‌مه‌ش ده‌قه‌كه‌یه‌تى:-
ئەمڕۆ پێنجشەممە ڕێکەوتی (۲٠۱۸/۱/٤)ی زایینی کاتژمێر (۹:۳٠)ی سەرلەبەیانی، لە دیوانی وەزارەتی پلاندانانی عێراقی فیدراڵ یەکەم کۆبوونەوەی لیژنەی باڵای وردبینیکردنی میلاکی هەردوو وەزارەتی پەروەردە و تەندروستیی هەرێمی کوردستان و بە ئامادەبوونی سەرۆک و تەواوی ئەندامانی لیژنەکە ئەنجام درا.
لە کۆبوونەوەکەدا کە تا (۱:٠٠)ی نیوەڕۆ درێژەی هەبوو، زانیاری تەواو و وردی مووچەخۆرانی هەردوو وەزارەت (بە پێی سیستەمی بایۆمەتری و بە مووچەی تەواو و بێ پاشەکەوت) پێشکەش بە سەرۆک و ئەندامانی لیژنەکە کرا. لیژنەکەش بە ئەندامانی هەردوو وەزارەتی پەروەردە و تەندروستی حکومەتی هەرێمی کوردستانیان ڕاگەیاندووە کە "بە زووترین کات و لە ڕێگەی لیژنەی هونەری تایبەت و بە هەماهەنگی لەگەڵ دەستەی چاودێری دارایی عێراق، دەست بە وردبینی لیستەکان دەکەن و دوای پێکهێنانی لیژنە فەرعییەکان سەردانی هەرێمی کوردستان دەکەن بۆ دیاریکردنی چەند بابەتێک بۆ وردبینی" و داوا لە ئەندامانی هەردوو وەزارەت کراوە کە هەماهەنگی و کارئاسانیی زیاتریان هەبێت.
لە کۆبوونەوەکەشدا بڕیار لەسەر ئەوە دراوە کە کۆبوونەوەکان بە پێی پێویست و تا کۆتاییهاتنی وردبینی، بەردەوام بن و هەرێمى كوردستانیش هەموو ئاسانکاری و هاوکارییەک بۆ گەیشتن بە ئەنجامێکی باش، دەستەبەر بکات.
وەزارەتی پەروەردە و وەزارەتی تەندروستی
بەغدا ـ ۲٠۱۸/۱/٤
کۆمێنت (0)
تا ئێستا هیچ کۆمێنتێک نەکراوە.