په‌رله‌مانتارێكی یه‌كێتی رایده‌گه‌ێنێ، له‌دوای رووداوه‌كانی 16ی ئۆكتۆبه‌ر شاری كه‌ركووك و قه‌زاكانی داقووق، خورماتوو و دووبز به دۆخێكی مه‌ترسیدار و دژواردا تێپه‌ڕده‌بن و تاوان و ده‌ستدرێژی تێیاندا گه‌یشتووه‌ته ئاستێك هه‌موو به‌ها مرۆڤایه‌تییه‌كانی تێپه‌ڕاندووه.
محه‌ممه‌د عوسمان، په‌رله‌مانتاری یه‌كێتی نیشتمانی كوردستان له نووسیگه‌ی كه‌ركووكی ئه‌نجوومه‌نی نوێنه‌رانی عێراق كۆنفرانسێكی رۆژنامه‌ڤانی سازكرد و رایگه‌یاند: له‌دوای رووداوه‌كانی 16ی ئۆكتۆبه‌ری 2017 ، شاری كه‌ركووك و قه‌زاكانی داقووق، خورماتوو و دووبز به دۆخێكی مه‌ترسیدار و دژواردا تێپه‌ڕده‌بن، به‌تایبه‌تی هه‌ردوو قه‌زای دووز و خوورماتوو، تاوان و ده‌ستدرێژی تێیاندا گه‌یشتووه‌ته ئاستێك هه‌موو به‌ها مرۆڤایه‌تییه‌كانی تێپه‌ڕاندووه، ئه‌مه پێشێلكردنێكی زه‌قی ده‌ستووری عێراق و مافی مرۆڤیشه، ده‌چێته خانه‌ی جینۆسایدی گه‌لی كورده‌وه، سه‌رجه‌میشیان دۆكیۆمێنتكراون و له‌لایه‌ن چه‌ند گرووپێكی چه‌كداری به‌داخه‌وه به‌ناو حه‌شدی شه‌عبی ئه‌نجامدراون.
هه‌روه‌ها محه‌مه‌د عوسمان دواشی كرد هاوپه‌یمانان هێز له كه‌ركووك بڵاوبكه‌نه‌وه، لیستی برایه‌تی كه‌ركووكیش كۆبوونه‌وه‌یه‌ك سازبكات و ئاماده‌كاری بۆ كۆبوونه‌وه‌ی ئه‌نجوومه‌نی پارێزگا بكات، چونكه به‌بڕوای ئه‌و دواخستنی دیاریكردنی پارێزگار په‌یوه‌ندی به كۆنه‌بوونه‌وه‌ی ئه‌نجوومه‌نی پارێزگاوه هه‌یه.
ئاماده‌كردنی: رزگار
کۆمێنت (0)
تا ئێستا هیچ کۆمێنتێک نەکراوە.