14 پەرلەمانتاری كورد دیاری كراوە بۆ ئەوەی حەسانەیان لەسەر هەڵگیرێت، بەهۆی بەشداریكردنیان لە پڕۆسەی ریفراندۆم و بدرێنە دادگا و سزا بدرێن.
پەرلەمانتارێكی كورد لە پەرلەمانی عێراق رای گەیاند كە ناوی 14 پەرلەمانتاری كورد دیاری كراوە بۆ ئەوەی حەسانەیان لەسەر هەڵگیرێت، ئەوەش بەهۆی بەشداریكردنیان لە پڕۆسەی ریفراندۆم و بدرێنە دادگا و سزا بدرێن، كە كەمترین سزاكانیش زیندانیكردنی تاهەتایە.
بڕیار وایە لە كۆبوونەوەی داهاتوودا حەسانە لەسەر ئەو 14 پەرلەمانتارە هەڵبگیرێت و ئەوان بدرێنە دادگا، بۆیە ئەگەر پەرلەمان ئەو كارە بكات دەدرێنە دادگا و سزا دەدرێن.
لیژنەی كاروباری ئەندامانی پەرلەمانیش سێ راسپاردەی لە ئەنجوومەنی نوێنەرانی عێراق لە دژی ئەو پەرلەمانتارانە خوێندووەتەوە كە خۆی دەبینێتەوە لە هەڵگرتنی پارێزبەندیی یاسایی، چوونی پەرلەمانتاران بۆ بەردەم دادگا و قەدەغەكردنی چالاكیی ئەو 14 پەرلەمانتارە كوردە تاوەكو دۆسییەكەیان لە دادگا یەكلایی دەبێتەوە.
لەسەر داوای فراكسیۆنی دەوڵەتی یاسا و نزیكەی 100 پەرلەمانتاری عێراق، دەستەی سەرۆكایەتیی پەرلەمان نووسراوێكی بۆ دادگای باڵای فیدراڵی كردووە و داوای بۆچوون و بڕیاری لێكردووە لەبارەی ئەو پەرلەمانتارە كوردانەی لە ریفراندۆمی سه‌ربه‌خۆی كوردستاندا دەنگیان داوە. لەو 14 پەرلەمانتارە كوردە 10 ئەندامیان لە فراكسیۆنی پارتین، دوو ئەندامی فراكسیۆنی یەكێتی و دووەكەی دیكەش سەر بە فراكسیۆنی یەكگرتووی ئیسلامین.
کۆمێنت (0)
تا ئێستا هیچ کۆمێنتێک نەکراوە.