دۆناڵد ترەمپ، سەرۆكی ئەمریکا دوێنێ هەینی لە سەرەتای سەفەری دوازدە ڕۆژەی خۆیدا بۆ ڕۆژهەڵاتی ئاسیا، گەیشتە هاوایی و سەردانی پێنج وڵاتی دیکەش دەکات.كه ئەمە درێژترین سەفەری تره‌مپه بۆ ئاسیا، لە ماوەی 25 ساڵی رابردوودا.
سەفەری ترەمپ، بۆ ڕۆژهەڵاتی ئاسیا لە ژاپۆنەوە دەست پێ دەکات و پاشان سەردانی کۆریای باشوور، چین، ڤێتنام و فیلیپین دەکات.
بەپێی ڕاپۆرتی ڕۆیتەرز، دۆناڵد ترەمپ لە دوورگەی هاوایی جیا لە کۆبوونەوە لەگەڵ ئەندامانی ئەرکانی فەرماندەیی زەریای ئارام، سەردانی (پرل هاربر)ی کرد و ڕێزی لو کوژراوانی هێرشی ئاسمانیی ژاپۆن لە دیسەمبەری 1941 گرت.
هاوکات لەگەڵ ئەم سەفەرە ڕۆژی هەینی کۆشکی کرملین ئاشکرای کردووە، هەندێ دانوستان بۆ دیداری ولادیمیر پۆتین، سەرکۆماری ڕووسیا و دۆناڵد ترەمپ لە پەراوێزی کۆبوونەوەی ئابووریی ئاسیا ئەنجام دراون، ڕاوێژکارانی سەرکۆماری ئەمریکاش لە کاردانەوە بەم ڕاپۆرتە گوتوویانە، لەوانەیە ئەم دیدارە ڕوو بدات.
لەلایەکی دیکەشەوە دۆناڵد ترەمپ بە کەناڵی (فۆکس‌نیوز)ی ڕاگەیاند: "لەوانەیە لەگەڵ پۆتین دیدار پێک بێنین، چونکە ئەم دیدارە گرنگە و ئەوان دەتوانن لە قەیرانی کۆریای باکووردا یارمەتیدەرمان بن، ئەوانی هەروەها دەتوانن لە پرسی سووریا هاوکاریمان بکەن و ئێمەش دەبێت لەبارەی ئۆکرانیاوە گفتوگۆ بکەین".
ئەمڕۆش ترەمپ سەردانی ژاپۆن دەکات و لەوێ لەگەڵ بەرپرسانی ئەو وڵاتە لەبارەی قەیرانی مووشەکیی و ناوکیی کۆریای باکوور باس و گفتوگۆ دەکەن.
کۆمێنت (0)
تا ئێستا هیچ کۆمێنتێک نەکراوە.