دەزگای خێرخوازیی بارزانی بە ھاوکاری وەزارەتی کۆچ و کۆچبەرانی عێراقی، ھاوکارییان گەیاندە ھەزار خێزانی کەرکووک، کە بەھۆی شەڕ و ئاڵۆزییەکانی ئەم دواییەوە ژیان و ماڵی خۆیان بەجێ ھێشتووە.
ئەمڕۆ یەکشەممە 20/10/2017 تیمەکانی دەزگای خێرخوازیی بارزانی، بە ھەماھەنگی لەگەڵ وەزارەتی کۆچ و کۆچبەرانی عێراقی، پێداویستییە سەرەتاییەکانی وەکو بەتانی، خۆراکی وشک و پێداویستیی تەندروستییان بەسەر ھەزار خێزانی کەرکووکیدا کە روویان لە ھەولێر کردووە دابەش کرد.
ئەم چالاکییە لە بنسەڵاوەی سەر بە ھەولێر بەڕێوەچووە، زۆربەی خێزانەکان لەم ناوچەیەدا نیشتەجێن و لە داھاتوودا ھاوکاری دەگەیەنرێتە خێزانەکانی دیکەی کەرکووک کە لە گەڕەک و ناوچەکانی ھەولێردا نیشتەجێ بوون.
ھاوکات ھەر ئەمڕۆ، دەزگای خێرخوازیی بارزانی، چالاکییەکی فراوانی بۆ قوتابیانی سنووری پەروەردەی ئیدارەی گەرمیان بەڕێوە برد و جانتا و پێداویستیی خوێندنی پێشکەشی 360 قوتابی بنەڕەتی پۆلەکانی 1 ھەتا 6 لە کەلار و کفری کرد.
کۆمێنت (0)
تا ئێستا هیچ کۆمێنتێک نەکراوە.