رۆژنامه‌ی "میسانگرو"ی ئیتاڵی له زاری مارۆك مینیتی، وه‌زیری ناوخۆی ئیتاڵیا بڵاویكردووه‌ته‌وه، كه رێكخراوی تیرۆریستى داعش توانیویه‌تی 80%ی چه‌كداران به‌هۆى تۆرى "ئه‌نته‌رنێت" بهێنێته رێزه‌كانییه‌وه، بۆیه ئه‌نته‌رنێت رۆڵێكی سه‌ره‌كی هه‌بووه له گواستنه‌وه و بڵاوكردنه‌وه‌ی بیرى توندڕه‌وى ئایینی له جیهاندا.
وه‌زیری ناوخۆی ئیتاڵیا، هه‌روه‌ها رایده‌گه‌یه‌نێت، كه به‌كارهێنانی ئه‌نته‌رنێت بۆ كرده‌وه‌ی تیرۆریستی، كارێكی ئاڵۆزو مه‌ترسیداره و چاره‌سه‌ركردنیشی به هه‌مان شێوه ئاڵۆزه‌و ئاسان نییه.
رێكخراوی داعش، له رێگه‌ی ئینته‌رنێته‌وه، به هه‌زاران موسڵمانی توندڕه‌وه‌ی له وڵاتانی جیاجیای جیهان هێناوه‌ته ریزه‌كانی و توانیویه‌تی وایان لێبكات، وڵاته‌كانییان جێبهێڵن و به‌ره‌و ناوچه‌كانی ژێر ده‌سه‌ڵاتی رێكخراوه‌كه كۆچ بكه‌ن.
له لایه‌كى تره‌وه ئه‌مرۆ ژماره‌یه‌ك سه‌رچاوه‌ى هه‌والى جیهانى ئاشكرایان كرد، كه چه‌كدارانى تیرۆریستى داعش به كۆمه‌ل له خاكى سووریاوه به‌ره‌و هه‌رێمى وه‌زیرستان له پاكستان كۆچ ده‌كه‌ن.
له‌م باره‌وه ئاژانسى "نۆڤۆستى" رووسی له سه‌ر زارى (ئه‌ندریه نۆفیكۆف) سه‌رۆكى ناوه‌ندى رووبه‌رووبوونه‌وه‌ى تیرۆر له رووسیا رایگه‌یاند" له پایزى سالى 2016ه‌وه ژماره‌یه‌كى زۆرى تیرۆریستانى داعش له خاكى عێراق و سووریاوه بۆ هه‌رێمى وه‌زیرستانى پاكستان گوازراونه‌ته‌وه‌و له ئێستادا ژماره‌یان له سووریا به‌ره‌و كه‌مبوونه‌وه ده‌چێت.
كوردستان تیڤی/ رفعت مزورى
کۆمێنت (0)
تا ئێستا هیچ کۆمێنتێک نەکراوە.