دەسەڵاتی دادوەریی ئێران جێبەجێکردنی سزای لەسێدارەدانی بەسەر هاووڵاتییەکدا ڕاگەیاند، کە لە خۆپێشاندانەکانی مانگی کانوونی دووەمی ڕابردوودا بە تۆمەتی تەقەکردن لە هێزەکانی پۆلیس دەستگیر کرابوو.
ئەمڕۆ شەممە 3ـی تشرینی یەکەمی 2026، دەسەڵاتی دادوەریی ئێران لە ڕاگەیەندراوێکدا بڵاوی کردەوە، سزای لەسێدارەدان بەسەر پیاوێکدا جێبەجێ کراوە کە لە میانی خۆپێشاندانەکانی مانگی کانوونی دووەمدا بە تۆمەتی تەقەکردن لە هێزەکانی پۆلیس دەستبەسەر کرابوو.
دەسەڵاتی دادوەری ئاماژەی بەوە کردووە، ئەو کەسە ناوی (سیاوەش جەمشیدی خێرئابادی) بووە و لە 8ـی مانگی کانوونی دووەمی ڕابردوودا لانی کەم سێ گولـلەی بە ئەندامانی پۆلیسەوە ناوە و دوای دوو ڕۆژ لە شاری شەهرەکورد لە باشووری ڕۆژئاوای ئێران بە دەمانچەیەکەوە دەستگیر کراوە، هاوکات تۆمەتبار کراوە بە پەیوەندیکردن لە ڕێگەی ئینتەرنێتەوە بۆ ڕێکخستنی چالاکیی دژەئەمنی و هەوڵدان بۆ وەرگرتنی پارە لە بەرامبەر جێبەجێکردنی ئەرکێکدا، بەبێ ئەوەی ناوی هیچ لایەنێک ئاشکرا بکرێت کە لە پشت ئەو بابەتەوە بووبێت.
شایەنی باسە، خۆپێشاندانەکان لە 28ـی کانوونی یەکەمی 2025 بەهۆی بارودۆخی سەختی ئابوورییەوە سەریانهەڵدا و دواتر فراوانتر بوون بۆ ناڕەزایەتیی بەرفراوان کە داوای کۆتاییهێنان بە دەسەڵاتی دامەزراوەی ئایینییان لە وڵاتەکەدا دەکرد، لە بەرامبەریشدا ئێران گرووپە چەکدارەکان و ئەو لایەنانەی بە تێوەگلان لە توندوتیژی تۆمەتبار دەکرد کە لەلایەن ئەمەریکا و ئیسرائیلەوە پاڵپشتی دەکران.
کۆمێنت (0)
تا ئێستا هیچ کۆمێنتێک نەکراوە.