وەزارەتی شارەوانی: پڕۆژەی نوێ لە کفری، کەلار، چەمچەماڵ و گەرمیان جێبەجێ دەکرێت

وەزارەتی شارەوانی و گەشتوگوزار ڕەزامەندی لەسەر خەرجکردنی گوژمەی دارایی بۆ چەند پڕۆژەیەکی خزمەتگوزاری لە گەرمیان، کەلار، کفری و چەمچەماڵ دا

ئەمڕۆ پێنجشەممە 27ـی ئاب، وەزارەتی شارەوانی و گەشتوگوزاری حکوومەتی هەرێمی کوردستان، ڕایگەیاند: لە چوارچێوەی هەوڵەکانمان بۆ پەرەپێدانی پڕۆژەکان و باشترکردنی ئاستی خزمەتگوزارییەکان، لە چەند فەرمانێکی وەزاریدا ڕەزامەندیمان نیشان دا لەسەر خەرجکردنی گوژمەی دارایی پێویست بۆ جێبەجێکردنی چەندین پڕۆژە لە سنووری گەرمیان، کەلار، کفری و چەمچەماڵ.

ئەم پڕۆژانە کە تێچووەکەیان لەسەر داهاتی شارەوانی و ئاو دابین کراوە، سنووری بەڕێوەبەرایەتییەکانی ئاوی گەرمیان و کەلار، لەگەڵ سەرۆکایەتییەکانی شارەوانیی چەمچەماڵ و کفرى دەگرێتەوە. پڕۆژە پەسەندکراوەکان بریتین لە:

1. لە شاری کفری:

  - جێبەجێکردنی پڕۆژەی دووسایدی لای مزگەوتی ئاشتی.

  - پڕۆژەی دووسایدی گەڕەکی شەهیدان.

  - پڕۆژەی دووسایدی ئەنفالەکان.

2. لە چەمچەماڵ:

  - دروستکردنی ئاوەڕۆی لوولەیی بۆ بەشێکی گەڕەکی خان.

  - دابینکردنی تۆڕی ئاو بۆ ئاودانی باخچەکان لە ناوچەکەدا.

3. لە گەرمیان:

  - دابینکردنی ئامێرە تەکنیکییەکانی "Soft Starter" و "VFD" بۆ گەنجینەی بەڕێوەبەرایەتیی ئاوی گەرمیان.

4 . لە کەلار:

  - ئەنجامدانی کارەکانی چاکسازی لە پەمپ و ماتۆڕەکانی یەکەی وەرگری پڕۆژەی ئاوی  کەلار 1.