مەسعود پزیشکیان، سەرۆک کۆماری ئێران، لە نوێترین لێدوانیدا ڕایگەیاند کە وڵاتەکەی لە پێگەیەکی لاوازدا نییە و تەواوی ئامادەکارییەکانی کردووە بۆ بەرگریکردن لە سەروەریی خاکەکەی. پزیشکیان جەختی کردەوە کە ئێران هەرگیز دەستپێشخەری بۆ هیچ جەنگێک نەکردووە، بەڵکو تەنیا مافی ڕەوای خۆی بەکاردەهێنێت بۆ پاراستنی ئاسایشی نیشتمانی.
سەرۆک کۆماری ئێران ئاماژەی بەوە کرد کە هەوڵەکانی تاران بۆ بەهێزکردنی توانای بەرگری، بە مانای دوژمنایەتی بۆ وڵاتانی دراوسێ نایەت، بەڵکو ئەرکێکی نیشتمانییە بۆ ڕێگریکردن لە هەر جۆرە دەستدرێژییەک. ناوبراو داوای لە وڵاتانی ئیسلامی کرد کە پێکەوە کار بکەن بۆ پاراستنی سەقامگیریی ناوچەکە و خۆیان لە تێکدانی ئاسایشی یەکتر بەدوور بگرن، چونکە نائارامی تەنیا خزمەت بە نەیارانی ناوچەکە دەکات.
ئەم لێدوانانەی پزیشکیان لە کاتێکدایە کە گرژییەکانی ناوچەی ڕۆژهەڵاتی ناوەڕاست گەیشتووەتە ئاستێکی باڵا و مەترسیی پێکدادانی سەربازیی ڕاستەوخۆ لە نێوان ئێران و نەیارەکانیدا هەیە. ئێران لە ساڵانی ڕابردوودا بەردەوام ڕووبەڕووی سزای نێودەوڵەتی و گوشاری سیاسی بووەتەوە، بەڵام بەرپرسانی تاران جەخت لەسەر ئەوە دەکەنەوە کە دەستبەرداری بەرنامە موشەکی و بەرگرییەکەیان نابن. حکوومەتە نوێیەکەی پزیشکیان، کە بە بەڵێنی چاکسازی و دیالۆگی نێودەوڵەتی هاتە سەر دەسەڵات، ئێستا لەبەردەم تەحەدییەکی قورسدایە بۆ هاوسەنگکردنی نێوان پێداویستییە بەرگرییەکان و باشترکردنی پەیوەندییەکان لەگەڵ کۆمەڵگەی نێودەوڵەتیدا.
کۆمێنت (0)
تا ئێستا هیچ کۆمێنتێک نەکراوە.