ئێوارەی ئەمڕۆ چوارشەممە، لە ڕووداوێکی هاتووچۆدا لە نزیک گوندی هیزۆپ لە دەڤەری ڕاپەڕین، کەسێک گیانی لەدەست دا و 3 کەسی تریش بریندار بوون. ڕووداوەکە لە جۆری پێکدادان بووە لە نێوان ئۆتۆمبێلێکی بارهەڵگری جۆری (کیا) و ئۆتۆمبێلێکی تایبەتی (بی ئێم دەبلیو).
بەپێی زانیارییە سەرەتاییەکان، ڕووداوەکە لە کاتژمێر 6:00ی ئێوارەی ئهمڕۆ ڕوویداوە و بەهۆیەوە شۆفێری بارهەڵگرەکە دەستبەجێ گیانی لەدەستداوە. هەروەها لەناو ئۆتۆمبێلە تایبەتەکەدا، شۆفێرەکە و ئافرەتێک و منداڵێک بریندار بوون، کە دوای ڕووداوەکە بۆ وەرگرتنی چارەسەری پزیشکی ڕەوانەی نەخۆشخانەی فریاکەوتن کراون. تیمی هاتووچۆ گەیشتوونەتە شوێنی ڕووداوەکە و لێکۆڵینەوەیان بۆ زانینی هۆکار و چۆنیەتی پێکدادانەکە دەستی پێ کردووە.
ڕووداوەکانی هاتووچۆ لە هەرێمی کوردستان بە یەکێک لە تەحەدییە گەورەکانی بەردەم سەلامەتیی گشتی دادەنرێن، کە ساڵانە دەبنە هۆی گیانلەدەستدانی سەدان کەس و برینداربوونی هەزارانی تر. لایەنە پەیوەندیدارەکان و بەڕێوەبەرایەتییەکانی هاتووچۆ بەردەوام هۆشداری دەدەنە شۆفێران کە پابەندی خێرایی دیاریکراو بن و وریایی زیاتر بنوێنن، بەتایبەت لەو ڕێگەیانەی کە قەرەباڵغییەکی زۆریان لەسەرە یان کوالێتیی ڕێگەوبانەکان تێیاندا وەک پێویست نییە. تەنیا لە شەش مانگی یەکەمی ئەمساڵدا، دەیان ڕووداوی پێکدادان و وەرگەڕان لە ناوچە جیاوازەکانی هەرێم تۆمار کراون کە زۆربەیان بەهۆی تیژڕەوییەوە بوون.
کۆمێنت (0)
تا ئێستا هیچ کۆمێنتێک نەکراوە.