عەلی فالح زەیدی، سەرۆک وەزیرانی عێراق، پێشوازی لە خالید بن عەلی حومەیدان، سەرۆکی دەزگای هەواڵگریی گشتیی سعوودیە کرد. لە دیدارەکەدا پەرەپێدانی پەیوەندییەکان و هەماهەنگیی ئەمنیی نێوان بەغدا و ڕیاز تاوتوێ کران.
سەرۆک وەزیران جەختی لە پەرۆشیی حکوومەتی عێراق کردەوە بۆ چەسپاندنی پەیوەندییەکانی لەگەڵ شانشینی سعوودیە بە جۆرێک کە خزمەت بە بەرژەوەندیی هەردوو وڵات بکات و ببێتە مایەی بەهێزکردنی ئاسایش و سەقامگیری لە ناوچەکەدا.
لە تەوەرێکی گرنگی کۆبوونەوەکەدا، عەلی فالح زەیدی هەڵوێستی نەگۆڕی حکوومەتەکەی دووپات کردەوە بۆ پاراستنی سەروەریی خاکی عێراق و بەرژەوەندییەکانی گەلەکەی. ڕاشیگەیاند: "ڕێگە نادەین خاکی عێراق ببێتە شوێنێک بۆ ئەنجامدانی هیچ جۆرە چالاکییەک کە زیان بە ئاسایشی وڵاتانی دیکە بگەیەنێت."
بەپێی ڕاگەیەندراوێکی فەرمی، هەردوولا لەسەر گرنگیی بەردەوامبوونی هەماهەنگیی ئەمنی و ئاڵوگۆڕی زانیاری لە نێوان دەزگا پەیوەندیدارەکاندا ڕێککەوتن، تاوەکو توانای بەرەنگاربوونەوەی ئاڵنگارییە ئەمنییەکان بەهێزتر بکرێت. لە کۆتایی دیدارەکەدا، سەرۆکی هەواڵگریی سعوودیە جارێکی دیکە بانگهێشتی فەرمیی وڵاتەکەی ئاراستەی سەرۆک وەزیرانی عێراق کرد بۆ سەردانیکردنی شاری ڕیاز.
کۆمێنت (0)
تا ئێستا هیچ کۆمێنتێک نەکراوە.