پەرەسەندنە سەربازییەکانی نێوان واشنتن و تاران گەیشتنە قۆناغێکی نوێ ، دوای ئەوەی سوپای پاسدارانی ئێران ڕایگەیاند کە لە وەڵامی هێرشە ئاسمانییەکانی ئەمریکا بۆ سەر خاکەکەی، چەند بنکە و شوێنێکی جێگیربوونی هێزەکانی ئەمریکای لە ناوچەکەدا کردووەتە ئامانج.
بەپێی ڕاگەیەندراوێکی فەرمیی سوپای پاسداران، ئەم ئاڵۆزییە دوای ئەوە دێت کە ئیسرائیل ئاگربەستی باشووری لوبنانی پێشێل کردووە و هاوکات حکومەتی ئەمریکاش "هاوشێوەی هەمیشە" پابەندی بەڵێنەکانی نەبووە. سوپای پاسداران دەڵێت، ئەمریکا بە بیانووی ڕێگری لە کەشتییەک کە گوایە لە ڕێڕەوێکی نایاسایی لە گەرووی هورمزەوە تێپەڕیوە، هێرشی ئاسمانیی کردووەتە سەر کەناراوەکانی ئێران.
لە ڕاگەیەندراوەکەدا هاتووە، کە هێزی دەریایی سوپای پاسداران وەک پەرچەکردارێک بەرامبەر بەو "دەستدرێژییە"، ڕاستەوخۆ ئەو ناوچانەی کردووەتە ئامانج کە هێزەکانی سوپای ئەمریکای لێ جێگیر کراون. پاسداران جەختی کردووەتەوە کە ڕێگە نادەن هیچ هێرشێک بۆ سەر سەروەریی خاکی ئێران بێ وەڵام بمێنێتەوە.
ئەم پێکدادانە توندە تەنها چەند ڕۆژێک دوای واژۆکردنی لێکتێگەیشتنی نێوان هەردوو وڵات دێت کە بڕیار بوو بۆ ماوەی 60 ڕۆژ ئاگربەست و هێوربوونەوە لە ناوچەکەدا بەرقەرار بێت. چاودێرانی سیاسی هۆشداری دەدەن کە ئەم ڕووبەڕووبوونەوە ڕاستەوخۆیە، مەترسیی هەڵگیرسانی جەنگێکی بەرفراوان لە ڕۆژهەڵاتی ناوەڕاست و داخرانی یەکجاریی گەرووی هورمز زیاد دەکات، کە یەکێکە لە گرنگترین ڕێڕەوەکانی وزە لە جیهاندا.
تا ئێستا پنتاگۆن و وەزارەتی دەرەوەی ئەمریکا هیچ لێدوانێکی فەرمییان لەبارەی قەبارەی زیانەکانی بنکەکانیان یان وردەکاریی هێرشە بەرپەرچدەرەوەکەی ئێران بڵاونەکردووەتەوە، بەڵام باری ئامادەباشیی هێزەکانی ئەمریکا لە ناوچەکەدا گەیشتووەتە بەرزترین ئاست.
کۆمێنت (0)
تا ئێستا هیچ کۆمێنتێک نەکراوە.