گوتەبێژی وەزارەتی بەرگریی ئێران هەڕەشەی توندی لە ئەمریكا و ئیسرائیل كرد و رایگەیاند، بۆ هەر دەستدرێژییەكی دوژمن بۆ سەر وڵاتەكەیان، وەڵامی بەهێز و بەپەلەیان دەبێت.
عەمید رەزا تەڵایی گوتەبێژی وەزارەتی بەرگریی ئێران ئەمڕۆ سێشەممە رایگەیاند: هەر دەستدرێژییەکی نوێ لەلایەن دوژمنەوە، دەستبەجێ وەڵامێکی یەکلاکەرەوە و تۆکمەی دەبێت.
راشیگەیاند: دوژمن دەبێت لە بەرەکانی شەڕ و لە دیپلۆماسیدا ملکەچی مافەکانی گەلەکەمان بێت، ئەگەر ملکەچی داواکاری گەلەکەمان نەبێت ئەوا پێویستە چاوەڕێی دووبارە شکستەکانی بکاتەوە.
عەمید رەزا تەڵایی گوتیشی: سەرجەم هێزە چەکدارەکانی ئێران بەتەواوەتی ئامادەن بۆ وەڵامدانەوەی هەر دەستدرێژییەکی دوژمن.
ئەم لێدوانەی گوتەبێژی وەزارەتی بەرگریی ئێران لەکاتێکدایە کە لە چەند رۆژی رابردوودا گرژییەکانی نێوان ئێران و ئەمەریکا زیاتر پەرەی سەندووە، دوای ئەوەی میدیا جیهانییەكان باسیان لەوە كرد كە دۆناڵد ترەمپ سەرۆکی ئەمریکا بیر لە دەستپێکردنەوەی هێرشەکانی دژی ئێران دەکاتەوە.
کۆمێنت (0)
تا ئێستا هیچ کۆمێنتێک نەکراوە.