هێزەکانی پۆلیسی پارێزگای سلێمانی ژن و پیاوێکیان دەستگیر کرد کە بە شێوەیەکی دڕندانە ئازاری جەستەیی دوو منداڵی خۆیان دابوو کە تەمەنیان تەنها 8 و 4 ساڵانە.
بەگوێرەی ڕاگەیەندراوێکی پۆلیسی سلێمانی، دوای ئەوەی هێزەکانی پۆلیس ئاگادارکرانەوە لە هەبوونی حاڵەتێکی ئەشکەنجەدان، مەفرەزەکانی بنکەی پۆلیسی سەیوان دەستبەجێ چوونە شوێنی ڕووداوەکە و باوکی منداڵەکان و هاوسەرەکەیان دەستگیر کرد.
تۆمەتبارەکان پێکهاتوون لە باوکی منداڵەکان بەناوی (ع، م، م) کە لەدایکبووی ساڵی 1992ـە، لەگەڵ ژنەکەی کە هاوکات باوەژنی منداڵەکانە بەناوی (س، س، ع) و لەدایکبووی ساڵی 2001ـە، کە هەردووکیان بە ڕەگەز عەرەبن و تۆمەتبارکراون بە لێدان و ئازارگەیاندنی جەستەیی بەو دوو منداڵە تەمەن بچووکە.
لە ئێستادا باوکی منداڵەکان بە بڕیاری دادوەر و بەپێی ماددەی 29 لە یاسای چاودێری نەوجەوانان ڕاگیراوە، بەڵام ژنەکە بە دەستەبەری دارایی ئازاد کراوە و لێکۆڵینەوەکان لەبارەی وردەکاریی ڕووداوەکە بەردەوامن.
سەبارەت بە بارودۆخی منداڵەکانیش، پۆلیسی سلێمانی ئاماژەی بەوە کردووە کە دوای ئەوەی ڕەوانەی نەخۆشخانە کراون و چارەسەری پزیشکیی پێویستیان بۆ کراوە، ئێستا بە بڕیاری دادوەری لێکۆڵینەوە سپێردراون بە خانەی بێسەرپەرشتان بۆ ئەوەی لە ژینگەیەکی ئارامدا بپارێزرێن.
کۆمێنت (0)
تا ئێستا هیچ کۆمێنتێک نەکراوە.