وەزیری دەرەوەی ئێران بە سەردانێکی فەرمی گەیشتە شاری سانتپترزبۆرگی ڕووسیا و ڕایگەیاند کە گفتوگۆی بەردەوام و دووقۆڵییان لەگەڵ ڕووسیادا هەبووە.
ڕۆژی دووشەممە 27ـی نیسان، عەباس عێراقچی، وەزیری دەرەوەی ئێران، لە سەرەتای گەیشتنیدا بە شاری سانتپترزبۆرگی وڵاتی ڕووسیا ڕایگەیاند: "ئێمە هەمیشە ڕاوێژی نزیک و گفتوگۆی بەردەوام و دووقۆڵیمان لەگەڵ ڕووسیادا هەبووە".
وەزیری دەرەوەی ئێران ئاماژەی بەوەش کرد، ماوەیەک بەهۆی جەنگەوە دابڕان لە دیدارەکانیاندا دروست بووە و گوتی: "ئەم دەرفەتە ڕەخسا تا سەبارەت بە پێشهاتەکانی پەیوەست بە جەنگ لەم ماوەیەدا و دۆخی ئێستا، لەگەڵ دۆستە ڕووسەکانماندا ڕاوێژ بکەین و پێداچوونەوە بە دوایین بارودۆخدا بکەین. سروشتیشە کە دەبێت هەماهەنگیی پێویست ئەنجام بدرێت".
عەباس عێراقچی، وەزیری دەرەوەی ئێران، ڕۆژی یەکشەممە 26ـی نیسان، دوای سەردانەکەی بۆ مەسقەت و دیدارەکانی لەگەڵ بەرپرسانی باڵای عومان، بۆ دووەمجار لە ماوەی سێ ڕۆژدا سەردانی ئیسلام ئابادی پایتەختی پاکستانی کردەوە و پێش سەفەرەکەی بۆ ڕووسیا، لەگەڵ بەرپرسانی پاکستان کۆبووەوە.
کۆمێنت (0)
تا ئێستا هیچ کۆمێنتێک نەکراوە.