کۆمیسیۆنی باڵای پەنابەرانی سەر بە نەتەوە یەکگرتووەکان هۆشداری لە تێکچوونی دۆخی مرۆیی لە لوبنان دەدات و ڕایدەگەیەنێت، وڵاتەکە لە لێواری کارەساتێکی ڕاستەقینەدایە.
کارۆلینا لیندۆڵم بێڵینگ، نوێنەری کۆمیسیۆنی باڵای پەنابەرانی نەتەوە یەکگرتووەکان لە لوبنان، لە کۆنگرەیەکی ڕۆژنامەوانیدا ڕایگەیاند، دۆخەکە زۆر جێگەی نیگەرانییە و مەترسییەکی جددی هەیە بۆ ڕوودانی کارەساتێکی مرۆیی گشتگیر، ئەمەش دوای تێپەڕبوونی نزیکەی مانگێک بەسەر هەڵگیرسانی جەنگ لە ناوچەکەدا.
ئاماژەی بەوەش کرد، لە سەرەتای مانگی ئادارەوە بەهۆی پەرەسەندنی شەڕی نێوان ئیسرائیل و حزبوڵڵا، زیاتر لە ملیۆنێک کەس لە لوبنان ئاوارە بوون و ماڵ و حاڵی خۆیان جێهێشتووە.
ئەم هۆشدارییەی نەتەوە یەکگرتووەکان لە کاتێکدایە، کە گرژییەکانی نێوان ئیسرائیل و گرووپە چەکدارەکانی سەر بە ئێران لە لوبنان چووەتە قۆناغێکی مەترسیدار و بەهۆی بۆردومانە بەردەوامەکانەوە، ژێرخانی ئابووری و کۆمەڵایەتی ئەو وڵاتە ڕووبەڕووی داڕمان بووەتەوە، ئەمەش وایکردووە دامەزراوە نێودەوڵەتییەکان داوای دەستبەجێ ڕاگرتنی شەڕ و گەیاندنی هاوکارییە مرۆییەکان بکەن.
کۆمێنت (0)
تا ئێستا هیچ کۆمێنتێک نەکراوە.