بەڕێوەبەرایەتی هاتوچۆی هەولێر هۆشداری دەداتە هاووڵاتییان و شوفێران بەهۆی شەپۆڵی بارانبارین و داوایان لێ دەكات ئەگەر بۆ كاری زۆر گرنگ و پێویست نەبێت شەقام و رێگاكان بەكار نەهێنن.
لە ئاگادارییەكی هاتوچۆی هەولێر هاتووە "لە ئەنجامی پێشبینییەکانی کەشناسی بەهۆی دابەزینی پلەی گەرما لە ڕۆژانی پێنجشەممە و هەینی شەپۆڵێکی باراناوی هەرێمی كوردستان بە گشتی و سنووری پارێزگای هەولێر سەنتەری شار و دەوربەری دەگرێتەوە".
هەروەها هاتووە "لە ماوەی ئەم شەپۆڵەدا ئەگەری بەرزبوونەوەی باراناو لە هەندێک شەقام و گەڕەکەکانی ناو شار هەیە، هەروەها لە ڕێگاکانی دەرەوەی شار بەهۆی نالەباری کەشوهەوا لێخوڕین سەخت دەبێت".
بەڕێوەبەرایەتی هاتوچۆی هەولێر بۆ ئەم مەبەستە داوای لە شوفێران كرد ئەگەر بۆ کاری زۆر گرنگ و پێویست نەبێت شەقام و ڕێگاکان بەکار نەهێنن تا شەپۆڵە بارانەکە کۆتایی پێ دێت و کەشوهەوا ئاسایی دەبێتەوە، بۆ ئەوەی تووشی ڕووداوی نەخوازراو نەبن.
کۆمێنت (0)
تا ئێستا هیچ کۆمێنتێک نەکراوە.