لە چوارچێوەی هەوڵە بەردەوامەکان بۆ هاوکاریکردنی کوردستانی ڕۆژئاوا و وەک ئەرکێکی نیشتمانی و مرۆیی، بەڕێوەبەرایەتی گشتی تەندروستی گەرمیان هەڵمەتێکی فراوانی بۆ دابینکردنی دەرمان و پێداویستی پزیشکی دەستپێکرد.
بەڕێوەبەرایەتی گشتی تەندروستی گەرمیان ڕایگەیاند: "وەک بەشێک لە بەرپرسیارێتییە نیشتمانییەکانمان، بڕێکی زۆر باش لە دەرمان و پێداویستی پزیشکی هەمەجۆرمان دابین کردووە بۆ ئەوەی ڕەوانەی ڕۆژئاوای کوردستانی بکەین."
هاوکات، بەڕێوەبەرایەتی گشتی تەندروستی بانگەوازێکی گشتی ئاڕاستەی هەموو لایەک کردووە بە مەبەستی کۆکردنەوەی هاوکاری زیاتر. لە بانگەوازەکەدا هاتووە: "داوا لە هەموو لایەک دەکەین هاوکارمان بن لەم هەڵمەتەدا؛ پێویستە لە ماوەی دوو ڕۆژدا پێداویستی و هاوکارییە پزیشکییەکان ڕادەستی کۆگا بکرێن، تاوەکو لە زووترین کاتدا بگەیەنرێنە شوێنی مەبەست و بخرێنە خزمەتی کوردانی ڕۆژئاوا."
ئەم هەوڵانە لە کاتێکدایە کە ناوچە جیاجیاکانی ڕۆژئاوای کوردستان پێویستییەکی زۆریان بە دەرمان و کەرەستەی پزیشکی هەیە، و بەڕێوەبەرایەتی گشتی تەندروستی گەرمیان لە ڕێگەی ئەم هەڵمەتەوە دەیەوێت بەشێک لەو پێداویستییانە پڕ بکاتەوە.
کۆمێنت (0)
تا ئێستا هیچ کۆمێنتێک نەکراوە.