بەڕێوەبەرایەتی گشتی پەروەردەی سۆران بڕیاری دا، سبەی چوارشەممە لە سەرجەم ناوەندەكانی خوێندن لە سنووری ئیدارەی سەربەخۆی سۆران بكرێتە پشوو بەهۆی نالەباری كەشوهەوا و بارینی بەفر و دروستبوونی شەختەوە.
پەروەردەی سۆران بڵاوی كردەوە "دوای ڕاوێژ لەگەل سەرپەرشتیاری ئیدارەی سەربەخۆی سۆران و قائیمقامەکان و وەرگرتنی دوایین ڕاپۆرتی کەشناسی لەسەر هاتنی شەپۆڵێکی بەفر و بارانی سەرتاسەری لە سنووری ئیدارەی سەربەخۆی سۆران و دابەزینی پلەکانی گەرما بۆ ژێر سفر، بۆ سەلامەتی گیانی پەروەردەکاران و قوتابیان، بەهۆی نالەباری کەشوهەوا و ئەگەری دروستبوونی شەختە بەتایبەت لە بەشێکی سنوورەکەمان، بڕیارمان دا سبەی چوارشەممە پشووی فەرمی بێت لە سەرجەم قوتابخانەکان".
بڵاویشی كردەوە: پشووەكە قوتابخانە حکوومی و ناحکوومییەكان و هەروەها پەیمانگەکانیش دەگرێتەوە.
ئەمە لە كاتێكدایە كە لە ناوەندەكەكانی خوێندن لە شارۆچكەی پێنجوێنیش لە سنووری پارێزگای سلێمانی بەهۆی ناجێگری كەشوهەوا و نزمبوونەوەی پلەكانی گەرما بۆ ژێر سفڕی سیلیزی، سبەی چوارشەممە پشوو راگەیەنرابوو.
کۆمێنت (0)
تا ئێستا هیچ کۆمێنتێک نەکراوە.