لە هەنگاوێکی چاوەڕواننەکراو و وەرچەرخانێکی گەورەی سیاسیدا، حکومەتی فیدراڵی عێراق لە ڕێگەی بەڵگەنامەیەکی فەرمییەوە گرووپەکانی حیزبوڵڵای لوبنان و حووسییەکانی یەمەنی وەک ڕێکخراوی تیرۆریستی ناساند و بڕیاری سڕکردنی سەرچاوە داراییەکانیانی دا.
ئەمڕۆ پێنجشەممە 4ی کانوونی یەکەمی 2025، ناوەڕۆکی ژمارە 4848ی ڕۆژنامەی فەرمیی (وەقائیعی عێراقی) بڵاوکرایەوە کە لە 17ی مانگی ڕابردوودا دەرچووە. بەگوێرەی بەڵگەنامەکە، لێژنەی سڕکردنی سەرمایە و سەرچاوە داراییەکانی تیرۆر لە بەغدا، بە فەرمی هەردوو گرووپی ناوبراوی وەک ڕێکخراوی تیرۆریستی ناساندووە و ئەمەش بە پێشهاتێکی نوێ لە سیاسەتی عێراق بەرامبەر گرووپە چەکدارەکانی ناوچەکە دادەنرێت.
بەپێی لیستەکە، حیزبوڵڵای لوبنان لە زنجیرەی ژمارە 18 و حووسییەکانی یەمەن لە زنجیرەی ژمارە 19 جێگیر کراون. لە خانەی "زانیارییەکان"ـی بەڵگەنامەکەدا، هۆکاری ئەم پۆلێنکردنە بۆ "بەشداربوون لە کردەی تیرۆریستی" گەڕێنراوەتەوە.
ئەم بڕیارەی حکومەت پشتبەستنە بە یاسای بەرەنگاربوونەوەی سپیکردنەوەی پارە و پشتیوانیی دارایی تیرۆر ژمارە 39ی ساڵی 2015. لێکەوتە یاساییەکانی ئەم بڕیارەش بریتی دەبن لە سڕکردنی سەرمایە و سەرچاوە داراییەکانیان و قەدەغەکردنی هەر جۆرە هاوکارییەکی دارایی یان بانکی لەگەڵیاندا لە چوارچێوەی سیستەمی دارایی عێراقدا.
کۆمێنت (0)
تا ئێستا هیچ کۆمێنتێک نەکراوە.