بە مەبەستی لێکۆڵینەوە لەو هێرشەی کرایە سەر کێڵگەی غازی کۆرمۆر و هەڵسەنگاندنی زیانەکان، شاندێکی هاوبەشی باڵا لە وەزارەتەکانی ناوخۆی عێراق و هەرێمی کوردستان سەردانی کێڵگەکەیان کرد و شوێنی هێرشەکەیان بەسەر کردەوە.
ڕۆژی هەینی، 28ی نۆڤەمبەری 2025، شاندێکی باڵا کە پێکهاتبوو لە عەبدولئەمیر شەممەری وەزیری ناوخۆی عێراق، حەمید شەتڕی سەرۆکی دەزگای هەواڵگریی عێراق و ڕێبەر ئەحمەد وەزیری ناوخۆی حکوومەتی هەرێمی کوردستان، گەیشتنە کێڵگەی غازی کۆرمۆر لە سنووری قەزای چەمچەماڵ.
دوای گەیشتنیان بۆ شوێنی مەبەست، کۆبوونەوەیەک لەنێوان هەردوو شاندی حکوومەتی فیدراڵ و حکوومەتی هەرێم دەستی پێ کرد بۆ تاوتوێکردنی دۆخی ئەمنی و چۆنیەتیی پاراستنی کێڵگەکە.
دواتر ئەندامانی شاندەکە بە مەیدانی سەردانی ئەو بەشانەی کێڵگەکەیان کرد کە بەهۆی هێرشەکەوە زیانیان پێ گەیشتبوو، بۆ ئەوەی لە نزیکەوە قەبارەی زیانەکان و وردەکاریی هێرشەکە ببینن و ڕێکاری پێویست بۆ ڕێگریکردن لە دووبارەبوونەوەی بگرنە بەر.
کێڵگەی غازی کۆرمۆر کە لەلایەن کۆمپانیای دانا غازی ئیماراتییەوە بەڕێوە دەبرێت و سەرچاوەی سەرەکیی دابینکردنی غازە بۆ وێستگەکانی کارەبای هەرێمی کوردستان، لە ماوەی چەند ساڵی ڕابردوودا چەندین جار بووەتە ئامانجی هێرشی مووشەکی و فڕۆکەی بێفڕۆکەوان.
بەپێی ئامارەکان، تەنیا لە ساڵی 2024دا چەندین هێرش کراوەتە سەر ئەم کێڵگەیە. دیارترین هێرش لە مانگی نیسانی 2024 بوو کە بەهۆی هێرشێکی درۆنییەوە 4 کارمەندی بیانی گیانیان لەدەست دا و ژمارەیەکیش بریندار بوون، ئەمەش بووە هۆی ڕاگرتنی کاتیی بەرهەمهێنانی غاز.
زۆربەی جار ئەم هێرشانە لەلایەن گرووپە چەکدارەکانەوە لە سنووری ناوچەکانی دەرەوەی دەسەڵاتی هەرێمی کوردستانەوە ئەنجام دەدرێن و ئامانجی سەرەکییان پەکخستنی ژێرخانی وزەی هەرێمی کوردستانە.
هەر جارێک هێرش دەکرێتە سەر ئەم کێڵگەیە، کاریگەریی ڕاستەوخۆی لەسەر کەمبوونەوەی بەرهەمهێنانی کارەبا لە هەرێمی کوردستان و کەرکووک دەبێت، بەو پێیەی نزیکەی 67 لەسەدی کارەبای هەرێم پشت بە غازی ئەم کێڵگەیە دەبەستێت.
کۆمێنت (0)
تا ئێستا هیچ کۆمێنتێک نەکراوە.