حكوومهتی ههرێمی كوردستان وردەکاریی یەکێک لە گەورەترین پڕۆژە ژینگەییەکانی ئاشکرا کرد، بریتییە لە "پشتێنەی سەوزایی هەولێر". ئەم پڕۆژەیە بە سەرپەرشتیی راستەوخۆی مەسرور بارزانی، سەرۆکی حکوومەت جێبەجێ دەکرێت و ئامانجی گۆڕینی سیمای ژینگەیی پایتەختە.
ژمارە و داتاکانی پڕۆژەکە:
قەبارە: دروستکردنی پشتێنەیەکی سەوز بە پانیی 2 کیلۆمەتر و درێژیی 78 کیلۆمەتر بە دەوری شاری هەولێردا.
ژمارەی دار: چاندنی نزیکەی حەوت ملیۆن دار.
جۆری دار: هەڵبژاردنی دارەکانی (زەیتوون و فستق) بەو پێیەی لەگەڵ کەشوهەوای ناوچەکە دەگونجێن و بەرگەی وشکەساڵی دەگرن.
هەشت ئامانجە سەرەکییەکەی پڕۆژەکە:
حكوومهتی ههرێم ڕایگەیاندووە کە ئەم پڕۆژەیە تەنیا چاندنی دار نییە، بەڵکو هەنگاوێکی ستراتیژییە بۆ بەدیهێنانی ئەم ٨ ئامانجە:
دابەزاندنی پلەی گەرمی: کەمکردنەوەی گەرمای ناو شار و باشترکردنی کەشوهەوای گشتی.
بەرەنگاربوونەوەی پیسبوون: هەڵمژینی گازە ژەهراوییەکانی وەک دووەم ئۆکسیدی کاربۆن (ساڵانە 140 بۆ 210 هەزار تۆن CO2 کەمدەکاتەوە) و لابردنی گەردیلە وردەکان.
بەربەستی تۆز و خۆڵ: کاردەکات وەک فیلتەرێکی سروشتی بۆ ڕێگریکردن لەو تۆزەی ڕوو لە شار دەکات.
باشترکردنی تەندروستیی گشتی: کەمکردنەوەی نەخۆشییە پەیوەندیدارەکان بە پیسبوونی هەوا.
ڕووبەری گەشتیاری و وەرزشی: دابینکردنی شوێنی سەوزایی بۆ وەرزشکردن و بەسەربردنی کات.
پاراستنی سیستمە ژینگەییەکان: ڕێگریکردن لە بەبیابانبوون، چەسپاندنی خاک و بەهێزکردنی هەمەجۆریی بایۆلۆجی.
بووژانەوەی ئابووری: ڕەخساندنی هەلی کاری بەردەوام لە بوارەکانی کشتوکاڵ، چاککردنەوە و بەبازاڕکردنی بەرهەمەکان (زەیتوون و فستق).
بەڕێوەبردنی ئاو: بەکارهێنانی تەکنەلۆجیای ئاودێریی زیرەک و دروستکردنی گۆمی دەستکرد.
کۆمێنت (0)
تا ئێستا هیچ کۆمێنتێک نەکراوە.