بەڕێوەبەرایەتیی هاتوچۆی دهۆک، چەند ڕێنماییەک ئاراستەی بەربژێر و لایەنە سیاسییەکان دەکات و هۆشداری دەدات لە هەڵواسینی پۆستەر لەسەر تابلۆکانی هاتوچۆ، بەکارهێنانی ئۆتۆمبێلی بارهەڵگر بۆ بانگەشە و داخستنی شەقامەکان.
بەڕێوەبەرایەتیی هاتوچۆی پارێزگای دهۆک، لە ڕاگەیێندراوێکدا داوا لە هەموو لایەنە سیاسییەکان و بەربژێرانی هەڵبژاردنی پەرلەمانی عێراق دەکات، کە لە کاتی بانگەشەدا پابەندی ڕێنماییەکانی هاتوچۆ بن.
گرنگترین ڕێنماییەکان:
• نابێت وێنە و پۆستەری بەربژێران بە ستوونی ترافیک و هێماکانی هاتوچۆوە هەڵبواسرێت.
• نابێت وێنەی گەورە لە نزیک فلکە و سەر شۆستەکان دابنرێت کە ببێتە هۆی کەمکردنەوەی بینین بۆ شۆفێران.
• پێویستە پۆستەرە گەورەکان بە باشی بچەسپێندرێن بۆ ئەوەی بەهۆی بایەوە مەترسی لەسەر گیانی هاووڵاتیان و ئۆتۆمبێلەکان دروست نەکەن.
• نابێت لە کاتی بانگەشەدا ئۆتۆمبێلی بارهەڵگر بەکاربهێندرێت.
• نابێت هیچ شەقام و کۆڵانێک بگیرێت، چونکە دەبێتە هۆی دروستبوونی ئاستەنگ، بەتایبەتی بۆ ئەمبوڵانس و حاڵەتی فریاکەوتن.
• قەدەغەیە پۆستەر بە جام و تابلۆ و دەرگای ئۆتۆمبێلەکانەوە هەڵبواسرێت.
• هەر لایەنێک ئۆتۆمبێلی بەکرێگیراو یان سلنگ بەکاربهێنێت، پێویستە پێشوەختە مۆڵەت لە هاتوچۆی دهۆک وەربگرێت.
لە کۆتایی راگەێیندراوەکەدا، هاتوچۆی دهۆک داوا لە شۆفێران دەکات بانگەشەی هەڵبژاردن نەکەنە دەرفەتێک بۆ ئەنجامدانی سەرپێچی و هۆشداری دەدات، هەرکەسێک پابەند نەبێت، ڕێکاری یاسایی لەبەرامبەردا دەگیرێتەبەر.
کۆمێنت (0)
تا ئێستا هیچ کۆمێنتێک نەکراوە.