دەزگای هەواڵگری نیشتمانی عێراق (INIS) پشتڕاستی کردەوە کە 47 هاووڵاتی فەرەنسی گومانلێکراو بە ئەندامێتی لە ڕێکخراوی تیرۆریستی داعش لە باکووری ڕۆژهەڵاتی سووریاوە گواستراونەتەوە بۆ عێراق. ئەم گواستنەوەیە لەکاتێکدایە کە هەندێک لە میدیاکان هەواڵی گواستنەوەی "هاووڵاتیانی فەرەنسی"یان بڵاوکردبووەوە، بەڵام INIS جەخت دەکاتەوە کە ئەم کەسانە تیرۆریستی داواکراون و پەیوەندییان بە تاوانە تیرۆریستییەکانی ناو عێراقەوە هەیە.
لە بەیاننامەیەکدا دەزگای هەواڵگری نیشتمانی عێراق ڕایگەیاندووە کە ئەو تۆمەتبارانەی گواستراونەتەوە ئەندامی ڕێکخراوی تیرۆریستی داعش بوون و داواکراوی دادگای عێراقین. بەشێکیان لە تاوانە تیرۆریستییەکاندا بەشداربوون کە لە نێوان ساڵانی 2014 بۆ 2017 لە عێراق ئەنجامدراون، کاتێک داعش چەند پارێزگایەکی عێراقی کۆنترۆڵکردبوو. هەندێکی دیکەش لە دەرەوەی عێراق "چالاکییە مەترسیدارەکانیان بۆ سەر ئاسایشی نیشتمانی عێراق" ئەنجامداوە.
گواستنەوەی ئەم کەسانە بۆ ناو خاکی عێراق لەسەر بنەمای فەرمانی گرتنی دادوەری بووە، کە پشتی بە لێکۆڵینەوەکانی دەزگای هەواڵگری گشتی گرتووە و لە ژێر سەرپەرشتی دەسەڵاتی دادوەریدا بووە. بڕیارە دادگایی ئەم تۆمەتبارانە بەپێی یاسا عێراقییەکان ئەنجامبدرێت.
دەزگای هەواڵگری نیشتمانی عێراق دووپاتی دەکاتەوە کە بەردەوام دەبێت لە ڕاوەدوونانی ئەو ئەندامانەی داعش کە تاوانیان دژ بە گەلی عێراق ئەنجامداوە، "هەر شتێک بێت ناسنامە و شوێنیان."
کۆمێنت (0)
تا ئێستا هیچ کۆمێنتێک نەکراوە.