بە فەرمانی وەزارەتی ناوخۆی حکوومەتی هەرێمی کوردستان، پۆلیسی هاتوچۆی هەولێر ڕێوشوێنی نوێ بۆ کۆنترۆڵکردنی ماتۆڕ دەگرێتە بەر و ئامانجیشیان کەمکردنەوەی ڕووداوەکانی هاتوچۆیە.
ئەمڕۆ ڕۆژی هەینی ١٩ی ئەیلولی ٢٠٢٥، بەڕێوەبەرایەتیی هاتوچۆی هەولێر ڕایگەیاند: "بە گوێرەی بە دواداچوونەکان، بەشی زۆری ڕووداوەکانی هاتووچۆ یان بە هۆی ماتۆڕسوارەوەیە یان ماتۆڕ و ماتۆرسوار یەکێکن لە لایەنەکانی هەر ڕوداوێکی هاتووچۆ کە بەردەوام یان مردن یان برینداربوونی سەختی لێ دەکەوێتەوە."
لە راگەیاندراوەکەی پۆلیسی هاتوچۆی هەولێردا هاتووە: "بە فەرمانی وەزارەتی ناوخۆ، لێژنەیەکی هاوبەشی نێوان پۆلیسی هاتوچۆ و پۆلیسی هەولێر، بازاڕەکانی کڕین و فرۆشتن و چاککردنەوەی ماتۆڕیان لە ناو سەنتەری شاری هەولێر ئاگادار کردووەتەوە بۆ ئەوەی خۆیان لە دروستکردنی ماتۆڕ بە پارچە و مامەڵەکردن بە ماتۆڕی بێ سەرەتا و تۆمار نەکراو بەدوور بگرن.
لەم پەیوەندییەدا هەر ئەمڕۆ، تیمەکانی پۆلیسی هاتووچۆی هەولێر، بۆ ئاگادارکردنەوەی هاووڵاتیان لە ڕێوشوێنەکانی یاسایی بەرامبەر بە ماتۆڕی بێ سەرەتا، لە بازاڕی شێخەڵڵا و بازاڕی هەینیی هەولێر ئامادە بوون.
پۆلیسی هەولێر ڕاشیگەیاندووە بۆ سەلامەتی هاووڵاتیان و کەمکردنەوەی قوربانیی ڕووداوەکان، لەمەولا هەر ماتۆڕسوارێک بە بێ کڵاو و پێویستییەکانی سەلامەتی لێخورینی ماتۆڕ لەسەر شەقامەکان ببینرێت، ئیجرائاتی لەگەڵ دەکرێت و دەست بەسەر ماتۆڕەکەیدا دەگیرێت.
پۆلیسی هاتوچۆی هەولێر داوای لە دایکان و باوکان کردووە ڕێگری لە هەرزەکارانیان بکەن بۆ ئەوەی نەبنە قوربانیی مانۆڕەکانی ماتۆڕسواری و هەروەها توشی سزای دارایی نەبن.
کۆمێنت (0)
تا ئێستا هیچ کۆمێنتێک نەکراوە.