لە هەولێر دەستكراوە بە دروستكردنی پێنج پاڕكی گەورەی نوێ

لە هەولێر دەست بە دروستكردنی پێنج پاڕكی گەورەی نوێ كراوە كە تێیدا زیاتر لە 40 هەزاری داری جیاوازی تێدا دەچینرێت.

پارێزگای هەولێر لەبارەی دروستكردنی پاڕكەكان رایگەیاندووە "لەپێناو زیادکردنی ڕێژەی سەوزایی و زیاتر پاراستنی ژینگەی شار، لە ناوەندی شاری ھەولێر لە سەر ڕووبەری 200 دۆنم زەوی، دەستکراوە بە دروستکردنی 5 پارکی گەورە، کە تێیدا 40 ھەزار دار دەچێندرێت".

ئاماژە بەوەش دەكات كە ئەمساڵ هەر پێنج پاڕکە نوێیەكە تەواو دەکرێت كە بریتین لەمانەی خوارەوە:-

1-  دروستکردنی پاڕکێک لە نزیک شەقامی 120 مەتری، لەسەر ڕووبەری 80 دۆنم زەوی و نزیکەی 8 ھەزار داری تێدا دەچێندرێت، ئێستا نزیکەی لە 70%ی کارەکانی تەواو بووە.

2- دروستکردنی پاڕکی رەشکین لەسەر ڕووبەری 47 دۆنم زەوی و 16 ھەزار داری تێدا دەچێندرێت، ئێستا لە 50%ی کارەکانی تەواو بووە.

3- دروستکردنی پاڕکی گەڕەکی نازدار لەسەر ڕووبەری 4 دۆنم زەوی و 6 ھەزار داری تێدا دەچێندرێت، ئێستا لە 80%ی کارەکانی تەواو بووە.

4- دروستکردنی پاڕکی گەڕەکی ژیان لەسەر ڕووبەری 7 دۆنم زەوی و 5 ھەزار داری تێدا دەچێندرێت، ئەویش ئێستا لە 70%ی کارەکانی تەواو بووە.

5- پاڕکی یەکتربڕی شەقامی 150 مەتری کە ڕووبەرەکەی 60 دۆنمە و کارکردن تیایدا بەردەوامە.

بەشێوەیەكی گشتی لە شاری ھەولێر ئێستا 26 پاڕکی گەورە و 204 باخچەی بچووک و 209 دارستان و 163 دوورگەی ناوەندی و 109 نافوورە هەن.