سەرۆک بارزانی لە پەیامێکدا شۆرشی ئەیلوولی وەک لاپەڕەیەکی زێڕینی بزووتنەوەی ڕزگاریخوازیی کوردستان و گەورەترین شۆڕشی سیاسی و چەکداری و جەماوەریی کوردستان ناوبرد کە بۆ قۆناغەکانی تری خەباتی گەلی کوردستانیش سەرچاوەی هێز و ئیلهام بووە.
ئەمڕۆ پێنجشەممە 11ـی ئەیلوولی 2025، سەرۆک بارزانی لە پەیامێکدا بە بۆنەی یادی 64 ساڵەی شۆڕشی مەزنی ئەیلوول ڕایگەیاند: "ئەم شۆڕشە بە ڕابەرایەتیی بارزانیی نەمر بۆ یەکەمین جار لە مێژوودا بناخەیەکی پتەوی بۆ تێکۆشان و خەباتی هاوبەشی ناوچە جیاجیاکانی کوردستان و گشت چینوتوێژەکان و پێکهاتەکانی کوردستان دانا، ئەویش لەپێناو بەرگریکردن لە دۆزی ڕەوا و مافەکانی خەڵکی کوردستان".
دەقی پەیامی سەرۆک بارزانی لە یادی شەست و چوار ساڵەی هەڵگیرساندنی شۆڕشی ئەیلوول
بەناوی خودای بەخشندە و میهرەبان
شۆڕشی ئەیلوول لاپەڕەیەکی زێڕینی بزووتنەوەی ڕزگاریخوازی کوردستان و گەورەترین شۆڕشی سەرتاسەریی سیاسی و چەکداری و جەماوەریی کوردستان بوو کە هانی خەڵکی کوردستانی دا بە هێز و بڕوابەخۆبوونەوە بەرەو ئامانجی نوێ و ئاسۆیەکی بەرفراوان هەنگاو بنێن و لە ئەنجامدا دۆزی گەلی کوردستان قۆناغی گەورە ببڕێت.
ئەم شۆڕشە بە ڕابەرایەتیی بارزانیی نەمر بۆ یەکەمین جار لە مێژوودا بناخەیەکی پتەوی بۆ تێکۆشان و خەباتی هاوبەشی ناوچە جیاجیاکانی کوردستان و گشت چینوتوێژەکان و پێکهاتەکانی کوردستان دانا، ئەویش لەپێناو بەرگریکردن لە دۆزی ڕەوا و مافەکانی خەڵکی کوردستان.
شۆڕشی ئەیلوول بۆ قۆناغەکانی تری خەباتی گەلی کوردستانیش سەرچاوەی هێز و ئیلهام بووە و، ئەزموون و دەستکەوتەکانی ئەو شۆڕشە مەزنە بۆ هەمیشە بەرچاوڕوونی دەداتە خەبات و تێکۆشانی گەلی کوردستان.
لە یادی شەست و چوار ساڵەی هەڵگیرساندنی شۆڕشی ئەیلوولدا دەستخۆشی و پێزانینم بۆ هەموو ئەو کادیر و پێشمەرگە و خەباتگێڕانە هەیە کە بە پێداگری و بوێری و ماندوویەتیی خۆیان مێژوو و شانازییان بۆ گەلەکەیان تۆمار کردووە. هەر لەم یادەدا هەزاران سڵاو بۆ شەهیدانی شۆڕشی ئەیلوول و سەرجەم شەهیدانی ڕێگەی ئازادیی کوردستان دەنێرین.
مسعود بارزانی
11ـی ئەیلوولی 2025
کۆمێنت (0)
تا ئێستا هیچ کۆمێنتێک نەکراوە.