لە ئەمڕۆ پێنجشەممەوە دوو شارۆچكە و چوار شارەدێی دیكە لە سنووری پارێزگای سلێمانی كارەبایان دەبێتە 24 كاتژمێری، بەمەش ژمارەی ئەو مۆلیدانەی لە پارێزگاكە دەكوژێنرێنەوە دەبنە 602 مۆلیدە.
بەڕێوەبەرایەتی كارەبای سلێمانی رایگەیاند "لەچوارچێوەی پرۆژەی رووناکی بۆ دابینكردنی كارەبای بەردەوام بۆ هاووڵاتییان، لە ئێوارەی ئەمڕۆ پێنجشەممەوە تەواوی هاوبەشانی کارەبا لە سنووری شارۆچكەی چوارتا و شارەدێكانی سیتەک و زەلان و باسنێ و گوندەکانی دەوربەری، هەروەها شارۆچكەی ماوەت و شارەدێی گاپێڵۆن و گوندەکانی دەوربەریان كارەباكەیان دەبێتە 24 كاتژمێری.
راشیگەیاند: ئەمڕۆ پێنجشەممە دەست دەکرێت بە پێدانی کارەبای 24 كاتژمێری بۆ ئەو دوو شارۆچكە و چوار شارەدێیەی سلێمانی کە ژمارەیان زیاتر لە 22 هەزار هاوبەشی کارەبایە.
ئەمە لەكاتێكدایە كە رۆژی پێنجشەممەی هەفتەی رابردوو هەر لە سنووری پارێزگای سلێمانی، کارەبای شارۆچكەی قەرەداغ و گوندەكانی دەروبەری، شارەدێی عەرەبەت و گوندەكانی دەوروبەری، شارەدێی بەرزنجە و گوندەکانی دەوەبەری، ببوونە 24 كاتژمێری.
ئێستا بەشێوەیەكی گشتی لە سنووری پارێزگای سلێمانی 372 هەزار هاوبەشی کارەبا و ملیۆنێك و 500 هەزار هاووڵاتی لە پرۆژەی رووناكی سوودەمەند بوونە و كارەبایان بووەتە 24 كاتژمێری، هەروەها لە 602 مۆلیدەش کوژێنراونەتەوە.
کۆمێنت (0)
تا ئێستا هیچ کۆمێنتێک نەکراوە.