ئەمرۆ هەینی 22ـی ئابی 2025، بەشی پۆلیسی دارستان و ژینگەی شەقڵاوە ڕایگەیاند کە ئاگر لە دارستانەکانی سنووری ناحیەی هیران لە گوندی پونگینە کەوتووەتەوە.
بەپێی ڕاگەیەندراوێکی بەشی پۆلیسی دارستان و ژینگەی شەقڵاوە، لە ئەنجامی ئاگرەکەدا کۆمەڵێک داری سروشتی و پووش و پاوان، هەروەها ڕەز و باخی هاووڵاتییان سووتاون.
تیمەکانی پۆلیسی دارستان و ژینگە لە شەقڵاوە بە هاوبەشی لەگەڵ بنکەی بەرگری شارستانی هیران و بە یارمەتی خەڵکی ناوچەکە، دوای چەند کاتژمێرێک لە هەوڵدان توانیان ئاگرەکە کۆنترۆڵ بکەن.
زیانەکانی ئاگرەکە بە زیاتر لە 10 دۆنم زەوی مەزەندە دەکرێت، تا ئێستا هۆکاری کەوتنەوەی ئاگرەکە نەزانراوە و لێکۆڵینەوە لە ڕووداوەکە بەردەوامە.
لە ڕاگەیەندراوەکەدا، پۆلیسی دارستان و ژینگەی هەولێر دەستخۆشی لە هەموو ئەو لایەنانە دەکات کە بەشداربوون لە کۆنترۆڵکردنی ئاگرەکەدا و داواش لە هاوڵاتیان دەکات کە هاوکاربن لە پاراستنی دارستان و ژینگەی کوردستان.
کۆمێنت (0)
تا ئێستا هیچ کۆمێنتێک نەکراوە.