وەزارەتی حەج و عومڕەی سعوودییە ئەمڕۆ چوارشەممە بەفەرمی ئەپڵیكەیشنێكی نوێی بەناوی (نسك عمرة) راگەیاند كە لە ڕێگەیەوە موسڵمانان لە سەرتاسەری جیهان راستەوخۆ دەتوانێت بەبێ هاوكاری كۆمپانیا و نێوەندگیری، داوای وەرگرتنی ڤیزە و هۆتێل و گواستنەوە و خزمەتگوزارییەكانی دیكەی ئەنجامدانی عومڕە بكات.
لە راگەیەنراوێكی وەزارەتی حەج و عومڕەی سعوودییە هاتووە: ئێستا هەر موسڵمانێك لە دەرەوەی وڵاتی سعوودییە بیەوێت گەشتی عومڕە ئەنجام بدات، دەتوانێت لە رێگەی ئەپڵێكەیشنی (https://umrah.nusuk.sa) داوای هەموو ئەو خزمەتگوزارییانە بكات كە بۆ ئەنجامدانی گەشتی عومڕە پێویستییەتی لەوانە ڤیزە، مانەوە، گواستنەوە، گەشتی شوێنە ئاینییەكان، هاوكاری و هەر خزمەتگوزارییەكی دیكە كە پێویست بێت.
هەروەها هاتووە: ئەپڵیكەیشنەكە بە 7 زمانی جیاواز بەردەستە و راستەوخۆ بەستراوەتەوە بە لایەنە پەیوەندارەكانی حكوومەت بۆ پاراستنی مافەكانی بەكارهێنەران.
ئاماژە بەوەشدراوە: ئەو كەسەی دەیەوێت عومڕە بكات، لە ڕێگەی ئەم ئەپڵیكەیشنەوە دەتوانێت پێش ئەنجامدانی گەشتەكەی، سەرجەم ئامادەكارییەكانی خۆی لە ناو خاكی سعوودییە بكات هەتا ئەو كاتەی دەگەڕێتەوە.
وەزارەتی حەج و عومڕەی سعوودییە جەختیشی كردەوە كە راگەیاندنی ئەم ئەپڵیكەیشنە یەكێكە لە پلانە ستراتیژییەكانی وڵاتەكەی بەو ئامانجەی تا ساڵی 2030 پێشوازی لە زۆرترین موسڵمانان بكرێت و بە ئاسانترین رێگە گەشتەكانی حەج و عومڕە ئەنجام بدرێت بە دابینكردنی باشترین خزمەتگوزارییەكان.
کۆمێنت (0)
تا ئێستا هیچ کۆمێنتێک نەکراوە.