لە سنووری ناحیەی سەنگاو، بەهۆی کێشەیەکی کۆمەڵایەتییەوە شەڕەتەقە لەنێوان دوو بنەماڵەدا روویدا، بەهۆیەوە کەسێک گیانی لەدەست دا و دوو کەسی دیکەش بریندار بوون.
ئەمڕۆ یەکشەممە 17ـی ئابی 2025، ئارام مارف، بەڕێوەبەری ناحیەی سەنگاو بە ئیبراهیم حاجی رەفعەت پەیامنێری کوردستان تیڤی راگەیاند: لە سنووری ناحیەی سەنگاوی سەر بە قەزای چەمچەماڵ، شەڕەتەقە لەنێوان دوو بنەماڵە لە گوندەکانی دلگە و هەنارە ـی سنوورەکەدا روویداوە و بەهۆیەوە کەسێک گیانی لەدەست دا و دوو کەسی دیکەش بریندار بوون.
بەڕێوەبەری ناحیەی سەنگاو گوتیشی: "بەهۆی شەڕەکەوە کەسێک بەناوی "سەردار عەلی" لە گوندی هەنارە کوژراوە و دوو کەسی دیکەش لە گوندی دلگە بریندار بوون".
بەپێی زانیارییەکان، شەڕەکە بەهۆی کێشەیەکی کۆمەڵایەتییەوە بووە.
ئارام مارف ئاماژەی بەوە کرد، تەرمی کوژراوەکە رەوانەی پزیشکی دادی چەمچەماڵ کراوە و دوای توێکاری رادەستی کەسوکاری کراوەتەوە، دوو بریندارەکەش بۆ وەرگرتنی چارەسەر رەوانەی نەخۆشخانەکانی سلێمانی کراون.
کۆمێنت (0)
تا ئێستا هیچ کۆمێنتێک نەکراوە.