دوو مانگی دیکە قۆناغی دووەمی پرۆژەی فریاگوزاریی ئاوی هەولێر دەکەوێتە کار

قۆناغی دووەمی پرۆژەی فریاگوزاریی خێرای ئاوی هەولێر بەرەو تەواوبوونە و بەڕێوەبەری ئاوی هەولێریش دەڵیت، 31 تیمیان بۆ چاودێریی بەفیڕۆنەدانی ئاو پێک هێناوە.

ڕۆژی یەکشەممە 10ـی ئاب، رابەر حوسێن، بەڕێوبەری ئاوی هەولێر، بە "دیجیتاڵ میدیای کوردستان تیڤی"ی ڕاگەیاند: "کارەکانی قۆناغی دووەمی پڕۆژەی فریاگوزاریی خێرای ئاوی هەولێر لە ماوەی دوومانگی داهاتوودا تەواو دەبن و دەست بە قۆناغی سێیەم دەکرێت".

بەرێوبەری ئاوی هەولێر گوتی: ئەو گەڕەک و گوندانەی لە قۆناغی دووەمی پرۆژەی فریاگوزاریی ئاوی هەولێر سوودمەند دەبن لە نێوان هەردوو شەقامی 120 مەتری و 150 مەترین و بریتین لە؛ عەنکاوە، 32ـی پارک، کوورانی عەنکاوە، بەحرکە، گردجووتیار و سێبەردان و چەندین گەڕەک و گوندی دیکە".

بەشێک لە هاوبەشانی ئاوی هەولێر تاوەکو ئێستا تەوافەیان بۆ تانکەری ئاوی سەربان دانەناوە و ئاوێکی زۆر بەو هۆیە بە فیڕۆ دەڕوات، بڕیارە بەڕێوەبەرایەتیی ئاوی هەولێر تیمی تایبەت بۆ بەفیڕۆنەدانی ئاو پێکبهێنێت و بەڕێوەبەری ئاوی هەولێریش دەڵێت، تیمەکان دەچنە ناو گەڕەکەکانی هەولێر.

وەکوو رابەر حوسێن ئاماژەی پێ کرد "بۆ ڕێگری لە بەفیرۆدانی ئاو، 31 تیم بۆ چاودێری کردنی ماڵان لە گەڕەکەکانی هەولێر دانراون".