لەگەڵ گەیشتنی شەپۆلێکی نوێی گەرمای تاقەتپڕووکێن و هۆشدارییەکانی کەشناسیی ئێران، پارێزگارانی 28 پارێزگای ئێران ئەمڕۆ پشوویان ڕاگەیاند و لە سێ پارێزگاکەی دیکەش ماوەی دەوام کەم کرایەوە.
ڕۆژی چوارشەممە 6ـی ئابی 2025، بە هۆی گەیشتنی شەپۆلێکی گەرما بۆ ناوچەکە و کورتهێنانی کارەبا و ئاو، پارێزگارانی 28 پارێزگای ئێران ڕایانگەیاند بە مەبەستی کۆنترۆڵی بەکارهێنانی وزە و پاراستنی تەندروستیی گشتی، ئەمڕۆ دەکەنە پشوو. تەنیا سێ پارێزگای ئیلام، هەمەدان و لوڕستان پشوویان ڕانەگەیاندووە بەڵام ماوەی دەوامیان کەم کردووەتەوە.
هاوینی ئەمساڵ زۆربەی ڕۆژانی چوارشەممە لە لانیکەم 23 پارێزگای ئێران کراوەتە پشوو و کورتهێنانی ئاو و کارەبا زیانێکی زۆری بە ئابووریی ئەم وڵاتە و پیشەسازییە گەورەکان گەیاندووە. بە پێی ئامارە فەرمییەکان بەرهەمی پیشەسازییەکانی ئاسن، چیمەنتۆ و پێترۆکیمیا 30٪ کەمی کردووە و ئەمەش بووەتە هۆی ئەوەی داهاتی هەناردەی بەرهەمە نانەوتییەکان 5 ملیار دۆلار کەم بێتەوە.
کارگەکان و وێستگەکانی بەرهەمهێنانی کارەبا، بۆ دابینکردنی کارەبا ڕوویان لە سووتاندنی سووتەمەنییە زیانبارەکان کردووە کە ئەمەش بووەتە هۆی پیس بوونی ژینگە و مردنی لانیکەم 26 هەزار کەس لە ساڵی ڕابردوودا.
بە هۆی پشووی بەردەوام و نەبوونی کارەباوە، کارگە گەورە و مامناوەندەکان و بنکە ئابووری و بازرگانییەکانی کەرتی تایبەت کە 80٪ی هێزی کاری ئێران لەخۆ دەگرن، چالاکییەکانیان 25٪ دابەزیوە و بەم هۆیەشەوە داهاتی ئەو هاووڵاتییانە لەم کەرتە کار دەکەن تا 40٪ کەم بووەتەوە.
کۆمێنت (0)
تا ئێستا هیچ کۆمێنتێک نەکراوە.