بەرەبەیانی ئەمڕۆ لە گەڕەکی فەرمانبەرانی شاری هەڵەبجە، لە ڕووداوێکی تەقەکردندا دوو کەس کوژران و کەسێکی دیکەش بریندار بوو، پۆلیسیش ڕایگەیاند دوو تۆمەتباریان لەسەر ڕووداوەکە دەستگیرکردووە.
بەڕێوەبەرایەتی پۆلیسی پارێزگای هەڵەبجە لە ڕاگەیێندراوێکدا ڕایگەیاند: کاتژمێر 3ـی بەرەبەیانی ئەمڕۆ سێشەممە 5ـی ئابی 2025، لە گەڕەکی فەرمانبەران ڕووداوێکی تەقەکردن ڕوویداوە.
بەپێی ڕاگەیێندراوەکە، بەهۆی ڕووداوەکەوە دوو هاووڵاتی کوژراون بەناوەکانی (ب. ج. ف)ـی تەمەن 20 ساڵ و (ش. م. ا) تەمەن 18 ساڵ، هەروەها کەسێکی دیکەش بەناوی (پ. م. ت)ـی تەمەن 31 ساڵ بریندار بووە.
بەپێی زانیارییەکان، بریندارەکە برینەکەی سەختە و رەوانەی نەخۆشخانەی سلێمانی کراوە.
پۆلیسی هەڵەبجە ئەوەشی خستووەتەڕوو، پەیوەست بە ڕووداوەکە و بە بڕیاری دادوەری لێکۆڵینەوە، دوو کەس وەک گومانلێکراو بەپێی مادەی 406 لە یاسای سزادان دەستگیرکراون.
لە کۆتایی ڕاگەیێندراوەکەدا هاتووە کە لە بنکەی پۆلیسی هەڵەبجە پەڕاوی لێکۆڵینەوە بۆ ڕووداوەکە کراوەتەوە و لێکۆڵینەوەکان بەردەوامن.
کۆمێنت (0)
تا ئێستا هیچ کۆمێنتێک نەکراوە.