دوای سێ ڕۆژ لە شەڕ و پێکدادانی ناوخۆیی لە سوەیدای سووریا، وەزیری بەرگریی ئەم وڵاتە ئاگربەستی ڕاگەیاند.
ڕۆژی سێشەممە، 15ـی تەمووز، مەرحەف ئەبوو قەسرە، وەزیری بەرگریی سوریا، لە بەیاننامەیەکدا ڕایگەیاند: ''دوای ڕێککەوتن لەگەڵ کەسایەتی و پیاوماقووڵانی شارەکە، ئاگربەستێکی گشتگیر بۆ هەموو یەکە سەربازییەکانی ناو شاری سوەیدا ڕادەگەیەنین".
ئەبوو قەسرە وتی: ''تەنها وڵامی ئەو کەسانە دەدەینەوە کە پشێوی دروست دەکەن و ڕووبەڕووی هەر ئامانجگرتنێک دەبینەوە کە لە لایەن گرووپە لە یاسا دەرچووەکانەوە ئەنجام بدرێت".
وەزیری بەرگریی سوریا، وتیشی: ''ڕێنمایی توندمان داوەتە هێزەکانی ناو شاری سوەیدا بۆ دابینکردنی ئاسایشی دانیشتووان و پاراستنی ئاشتیی کۆمەڵایەتی، هەروەها پاراستنی موڵک و ماڵی گشتی و تایبەت لە دەستی کەسانی نابەرپرس".
بە گوتەی مەرحەف ئەبوو قەسرە؛ ''هەر کە ئۆپەراسیۆنەکان کۆتاییان هات، دەست دەکەین بە ڕادەستکردنی گەڕەکەکانی شاری سوەیدا بە هێزەکانی ئاسایشی ناوخۆ، بە مەبەستی کۆنترۆڵکردنی پشێوی و گەڕانەوەی دانیشتووان بۆ ماڵەکانیان و گەڕاندنەوەی سەقامگیری بۆ شارەکە''.
ئەبو قەسرە جەختیشی کردەوە: سوپا فەرمانی کردووە بڵاوەپێکردنی هێزەکانی پۆلیسی سەربازی لەناو شاری سوەیدا دەست پێ بکات، بۆ چاودێریکردنی هەر هەڵسوکەوتێکی سەربازی و لێپرسینەوە لە سەرپێچیکاران.
شەڕی سوەیدا لە باشووری سووریا، دوای سێ ڕۆژ، کوژرانی 102 کەس و برینداربوونی سەدان کەسی دیکەی لێ کەوتەووە.
کۆمێنت (0)
تا ئێستا هیچ کۆمێنتێک نەکراوە.