ئەمڕۆ پێنجشەممە بەشێكی دیكەی پڕۆژەی دروستكردنی رێگای هەولێر – كۆیە كەوتە واری جێبەجێكردنەوە، ئەویش دروستكردنی جووتسایدی كەسنەزان – دەربەندی گۆمەسپانە.
ماڵپەڕی حكوومەتی هەرێمی كوردستان بڵاوی كردەوە "پرۆژەی جووتسایدی کەسنەزان- دەربەندی گۆمپەسپان دەستی پێ کرد کە پێكهاتووه له 15.5 كیلۆمەتر، 40 ئاوبهر، 4 بهرزهپرد و 1 ژێرپردی تێدایە و لەلایەن کۆمپانیاى هێمن گرووپ جێبەجێ دەکرێت".
بڵاویشی كردەوە "پڕۆژەکە پڕۆژەیەکى ستراتیژى و گرینگى سنوورى پارێزگاى هەولێره و بە تەواوبوونى سوودێکى زۆرى دەبێت بۆ هاتووچۆى هاووڵاتییان و گەشتیاران و کەمکردنەوەى قەرەباڵغیی سەر ڕێگاکە، کە پێشتر یەکساید بووە و ڕووداوى نەخوازراوى لێ کەوتۆتەوە".
حكوومەتی هەرێم ئاماژەی بەوەش دا "پڕۆژەکە هاوتەریب لەگەڵ پڕۆژەى دووسایدی گۆمەسپان - سماقووڵی کارى تێدا دەکرێت و بە تەواوبوونی، ڕێگای هەولێر تا ڕێگای سماقووڵی بە درێژیی 38 کیلۆمەتر دەبێتە دووساید".
کۆمێنت (0)
تا ئێستا هیچ کۆمێنتێک نەکراوە.