شارەوانی و ئەنجومەنی شارەوانیی تاران بە مەبەستی دابینکردنی پەناگەی کاتی جەنگ بۆ هاووڵاتییان، بڕیاریان دا لە پارکەکان پەناگە دروست بکرێت و گەراجە چەند نهۆمییەکانیش وەک پەناگە کەڵکیان لێ وەربگیرێت.
ئەمڕۆ یەکشەممە، 29ی حوزەیران، "ئەحمەد سادقێ"، سەرۆکی کۆمیتەی "شەفافییەت و شاری هۆشمەند" لە ئەنجومەنی شارەوانیی تاران ڕایگەیاند: لە کۆبوونەوەی ناوەندی قەیران کە بە ئامانجی "ئامادەیی گشتگیر لە بەرانبەر هەڕەشەکاندا" بەرێوەچوو، بڕیار درا: "بنکە تەندروستییەکان و ناوەندەکانی مانگی سوور لە گەڕەکەکان بکرێنەوە و پارکەکانیش وەک پەناگەی کاتی کەڵکیان لێ وەربگیرێت.
هاوکاتیش "مەهدی چەمران"، سەرۆکی ئەنجومەنی شارەوانیی تاران ڕایگەیاندووە: ئەو کۆمەڵگە و باڵەخانانەی زیاتر لە 50 یەکەی نشتەجێبوونیان هەبێت دەبێ "پەناگەی گونجاو" و "هەمووپێداویستییەکانی خۆحەشاردان"یان تێدا بێت.
بە گوتەی چەمران، گەراجە چەند قاتەکانیش دەتوانن وەک پەناگە بەکار بهێنرێن و پلانێکیش بۆ پتەوا کردنی باڵەخانە گەورەکان ئامادە دەکرێت.
لە ماوەی 12 ڕۆژ جەنگی نێوان ئێران و ئیسرائیلدا، حکوومەتی ئێران داوای لە هاووڵاتییان دەکرد لە نێو تونێلەکانی مێترۆدا خۆیان حەشار بدەن و بە هۆی نەبوونی پەناگەی پێویست بۆ هاووڵاتیان، ڕەخنەیەکی زۆر ڕووبەڕووی دەسەڵاتدارانی ئێران کرایەوە.
کۆمێنت (0)
تا ئێستا هیچ کۆمێنتێک نەکراوە.