سەرپەرشتیاری گشتیی ڕەوەندی کوردستانی، لەگەڵ فیدراسیۆن و ناوەندەکانی نەمسا کۆبوویەوە

سەرپەرشتیاری گشتیی ڕەوەندی کوردستانی، سەردانی وڵاتی نەمسای کرد و لەگەڵ فیدراسیۆن و ناوەندەکانی ئەو وڵاتە کۆبوویەوە و داوای لێکردن بۆ ھەڵبژاردنی پەرلەمانی ئەو وڵاتە دەنگ بە بەربژێرە کوردەکان بدەن.

ئەمڕۆ شەممە ڕێککەوتی ٥ی ٤ی ٢٠٢٥، شیفا بارزانی سەرپەرشتیاری گشتیی ڕەوەندی کوردستانی، سەردانی وڵاتی نەمسای کرد و لەگەڵ فیدراسیۆن و ناوەندەکانی ئەو وڵاتە کۆبوویەوە و بە ئامادەبوونی چەپەر حاجۆ بەربژێرە لەسەر لیستی پارتی سۆسیالیستی نەمسا بۆ پەرلەمانی ئەو وڵاتە، داوای لێکردن، کە دەنگ بە بەربژێرە کوردەکان بدەن.

لە سەردانەکەیدا شیفا بارزانی، کۆبوونەوەیەکی بە مەبەستی دەستخۆشی و ڕێزگرتن لە کار و ئەرکەکانیان لە ماوەی دوو ساڵی ڕابردوودا، کە وەک یەکێک لە باشترین و چالاکترین فیدراسیۆنەکان ھەژمار دەکرێت، لەگەڵ فیدراسیۆنی ڕەوەندی کوردستانی لە نەمسا ئەنجام دا.

هاوکات کادار جەھانگیر بەرپرسی فیدراسیۆنی ڕەوەندی کوردستانی لە نەمسا، وتاری بەخێرھاتنی پێشکەش کرد و ڕێگەی دا، کە ناوەندەکانی ڤییەننا و لینز و سالسبۆرگ ڕاپۆرتی چالاکییەکانیان بخەنەڕوو.

دواتر شیفا بارزانی، وێڕای دەستخۆشی لە فیدراسیۆنی ڕەوەندی کوردستانی نەمسا، داوای کرد پەلە بکەن لە دابینکردنی شوێنێکی گونجاو وەک بارەگا بۆ فیدراسیۆن لە ڤییەننا، ھەروەھا داوای لێکردن، کە کار بکەن لە ھەڵبژاردنەکانی ٢٧ی ئەم مانگە کوردستانییان دەنگ بە بەربژێرە کوردەکان بدەن و فیدراسیۆنی ڕاسپارد لەمبارەوە کۆمیتەیەک پێکبێنن و بە جددی کاری لەسەر بکەن.

شایانی باسە، چەپەر حاجۆ بەربژێرە لەسەر لیستی پارتی سۆسیالیستی نەمسا، ئامادەی دانیشتنەکە بوو و داوای پشتگیریی کرد و بەڵێنی دا، ئەگەر سەرکەوێت دەنگی کوردستانییان بێت لە پەرلەمانی نەمسا.