لە ئێوارەی ئەمڕۆ پێنجشەممەوە هێزێكی زۆری ئەمنیی لە دەوروبەری باڵیۆزخانەی سووریا لە بەغدای پایتەختی عێراق بڵاوەیان پێكراوە بەهۆی مەترسی خۆپیشاندان و هێرشكردنە سەر باڵیۆزخانەكە.
هێزەكان سەر بە هێزی چالاكییە مەدەنییەكان و لە ناوچەی مەنسوڕ لە شاری بەغدا لە دەروبەری باڵیۆزخانەی سووریا خراونەتە ئامادەباشییەوە.
بەگوێرەی زانیارییە رۆژنامەوانییەكان، هێزە ئەمنییەكان زانیارییان هەیە بەشێك لە هاووڵاتییان پلانی ئەنجامدانی خۆپیشاندان و هێرشكردنە سەر باڵیۆزخانەی سووریایان هەیە.
هێزە چالاكییە مەدەنییەكان بۆ پاراستنی باڵیۆزخانەكە و روونەدانی هەر ئاڵۆزییەك لە ناوچەكە بڵاوەیان پێكراوە.
زانیارییەكان ئاماژە بەوە دەكەن كە بەشێك لە هاووڵاتییانی بەغدا بەهۆی ئاڵۆزی و شەڕ و پێكدادانەكانی ئەم دواییەی نێوان هێزە ئەمنییەكانی حكوومەتی نوێی سووریا و چەكدارانی پێكهاتەی شیعە مەزهەبی عەلەوییەكان، نیازیان هەیە لەبەردەم باڵیۆزخانەی سووریا ناڕەزایەتی دەرببڕن و خۆپیشاندان ئەنجام بدەن.
کۆمێنت (0)
تا ئێستا هیچ کۆمێنتێک نەکراوە.