لەگەڵ دەستپێکردنەوەی خولێکی دیکەی دانوستانەکانی نێوان ئەمەریکا و ئۆکراینا بەمەستی چارەسەرکردنی قەیرانی جەنگی نێوان ئۆکراینا و ڕووسیا، مارکۆ ڕۆبیۆ وەزیری دەرەوەی ئەمەریکا ڕایگەیاند، ئەگەر دانوستانەکانی سبەی لە سعوودیە ئەنجامیان هەبێت ئەمەریکا بیر لەوە دەکاتەوە هاوکارییە سەربازییەکانی بۆ ئۆکراینا دەست پێ بکاتەوە.
مارکۆ ڕۆبیۆ وەزیری دەرەوەی ئەمەریکا لەنێو فڕۆكە پێش گەشتەکەی بۆ وڵاتی سعوودیە ڕایگەیاند: ئەگەر دانوستانەکانی سعوودیە ئەنجامیان هەبێت لەوانەیە ئەمەریکا پاڵپشتییە سەربازییەکانی بۆ ئۆکراینا دەست پێ بکاتەوە، بەر لە دەست پێکردنەوەی هاوکارییەکانیش پێویستە ئەمەریکا لەوە تێبگات کە ئۆکراینای گەمارۆدراو لەم دۆخە ناهەموارەی تێی کەوتووە ئامادەیە چی پێشکەش بە وڵاتەکەیان بکات لەبەرامبەر دەستپێکردنەوەی هاوکارییەکانی ئەمەریکا.
وەزیری دەرەوەی ئەمەریکا ئاماژەی بۆ ئەوەش کرد، هیوادارن کۆبوونەوەکەی جەددە لەنێوان ئەمەریکا و ئۆکراینا بە باشی بەڕێوەبچێت، بەڵام ئەوەی گرنگە ویستی ئۆکراینا بەڕوونی دیاری بکرێت، سەبارەت بە ئاشتی هەردوولایەنی جەنگ ئامادەییان نیشانداوە و ئەوەی ڕۆژی سێشەممە ڕوو دەدات کلیلی هەر بڕیارێک دەبێت.
ئەم لێدوانەی وەزیری دەرەوەی ئەمەریكا لەکاتێکدایە، زیلینسکی سەرۆکی ئۆکراینا ئەمڕۆ گەیشتە سعوودیە بۆ ئەوەی لەگەڵ محەمەد بن سەلمان شازادەی جێنشینی ئەو وڵاتە کۆببێتەوە، دواتریش بڕیارە ڕۆژی سێشەممە لەگەڵ بەرپرسانی ئەمەریکا لە شاری جەددە کۆببێتەوە.
کۆمێنت (0)
تا ئێستا هیچ کۆمێنتێک نەکراوە.