ئیمانوێل ماكڕۆن سه‌رۆككۆماری فه‌ره‌نسا له كۆشكی ئیلیزێ پێشوازی له نادیه موراد كچه كوردی ڕزگاربووی ده‌ستی داعش و براوه‌ی خه‌ڵاتی نۆبڵی ئاشتی كرد
ئه‌مڕۆ شه‌ممه 8-3-2025 ئیمانوێل ماكڕۆن له پێگه‌ی فه‌رمی خۆی له تۆری كۆمه‌ڵایه‌تی (ئێكس ) وێنه‌ی خۆی و نادیه مورادی بڵاوكردووه‌ته‌وه و رایگه‌یاندووه ، زۆر دڵخۆشم به بینینی نادیه موراد ده‌نگی ئازای ڕزگاربووانی ده‌ستی داعش .
هه‌ر به بۆنه‌ی رۆژی هه‌شتی مارسی جیهانی ماكرۆن رایگه‌یاندووه ، وڵاته‌كه‌ی به‌رده‌وام ده‌بێت له داكۆكی كردن له مافی ئافره‌تان و پاراستنیان له ده‌ستی سته‌م و به‌رته‌سكبوونه‌وه‌ی ئازادییه‌كانیان ، ئافره‌تان به‌شێكی گرنگن له به‌رقه‌راربوونی ئاشتی و سه‌قامگیری فه‌ره‌نسا و جیهان .
لای خۆیه‌وه نادیه موراد كچه كوردی رزگاربووی دەستی داعش كه ئێستا وەک چالاکوانێكی بواری مافەکانی مرۆڤ و ئافره‌تان کاردەکات، لە پۆستێکدا سوپاسی ئیمانوێڵ ماكرۆن سەرۆککۆماری فەرەنسای كردووه و رایگه‌یاندووه، مایه‌ی شانازییمه کە لە چەند ساڵی رابردوودا لەسەر پرسە گرنگه‌كانی په‌یوه‌ست به ئاشتی و مافی ئافره‌تانی جیهان پێکەوە لەگەڵ ئێوە کارم کردووە، چ لە لووتکەی جی حه‌وت یان کۆڕبەندی یەکسانیی نەوەکان بۆ پەرەپێدانی مافی ئافره‌تان و ئاشتی كه به‌یه‌كه‌وه رووبه‌رووی ململانێ و تنودوتیژیی سێكسی بووینه‌ته‌وه كه به‌رامبه‌ر ئافره‌تان ده‌كرێت له كۆمه‌ڵگه جیاوازه‌كاندا .
نادیه موراد بۆ ماكرۆن ئه‌وه‌شی خستووه‌ته‌ڕوو ، پشتیوانی ئێوه مایه‌ی هێزو به‌رده‌وامی ئێمه‌یه بۆ كاركردن له بواری مافه‌كانی مرۆڤ و ئافره‌تان و به‌رقه‌راربوونی ئاشتی له جیهاندا .
جێی وه‌بیرهێنانه‌وه‌یه ، لە هێرشەکەی بۆ سەر قه‌زای شنگال لە ساڵی 2014دا، رێكخراوی تیرۆرستی داعش کوردانی ئێزدیی کۆمەڵکوژ کرد و هەزاران ئافره‌تیشی له‌وان رفاند، یه‌كێكیش له‌و ئافره‌تانه كه داعش رفاندی نادیه موراد بوو كه به ئازارێكی زۆر له ده‌ستی داعش رزگاری بوو .
کۆمێنت (0)
تا ئێستا هیچ کۆمێنتێک نەکراوە.