قایمقامی چۆمان بڕیاری دا سبەی دووشەممە لە سەرجەم قوتابخانە و فەرمانگەكانی حكوومەت لە سنووری شارۆچكەكەیان پشووی فەرمی بێت بەهۆی بەفربارین و شەپۆڵی سەرماوە.
قایمقامییەتی چۆمان لە ئاگادارییەكدا بڵاوی كردەوە: ئەو شەپۆلە بەفربارینەی ئەمڕۆ سنووری شارۆچكەی چۆمان و شارەدێكانی گرتۆتەوە، بەهۆی دابەزینی پلەکانی گەرما بۆ خوار -9 تاكو -20 پلەی سیلیزی، بە ڕاوێژی شارەزاییانی کەشناسی کە مەترسی لەسەر هاتوچۆکردنی قوتابییان، بەهۆی بەستەڵەکی شەقام و ڕێگاکان ئەگەرێکی چاوەڕوانکراوە.
بڵاویشی كردەوە: لەپێناو بەرژەوەندیی گشتی بۆ سەلامەتی مامۆستا و قوتابیان و فەرمانبەرانی دامودەزگاکانی حکوومەت، لەسەر راسپاردەی قایمقامی قەزاکەمان ئەحمەد بارزان عەلیکۆ، بڕیاردرا بە پشووی فەڕمی لە سەرجەم دامودەزگاکانی حکوومەت و قوتابخانەکانی (حکوومی) و پەیمانگەکانی سنووری بەڕێوەبەرایەتیی پەروەردەی چۆمان، جگە لەو قوتابییانەی کە بەشداری ئەزموونە دەرەکییەکان دەکەن، بۆ رۆژی دووشەممە پشووی فەڕمی سەرجەم دامەزراوەکان دەبێت.
قایمقامییەتی چۆمان داواشی لە هاووڵاتییان كرد بەبێ شارەزابوونیان و بێ زنجیر و ئۆتۆمبێلی دەبڵ ئەکسڵ، سەردانی شوێنە شاخاوییەکانی سنوورەكەیان نەکەن.
کۆمێنت (0)
تا ئێستا هیچ کۆمێنتێک نەکراوە.