بەهۆی ئەو بانگەشەیەی باس لەوە دەکات کە هۆكاری ئاگرەكەی لۆس ئانجلس و دەوروبەری كە حەوت ڕۆژە بەردەوامە بەهۆی ئامێرە کارەباییەکانی کۆمپانیای دابەشکردنی کارەبای ئەمریکی، ساوسێرن کالیفۆرنیا ئەدیسۆن بووە، سکاڵا لەسەر کۆمپانیاکە تۆمار کرا.
سکاڵاکە بەناوی ئەو خاوەن ماڵ و کرێچی و خاوەن دووکانانەوە لە دادگای باڵای کالیفۆرنیا تۆمارکراوە کە بەهۆی ئاگرەکەی ئیتۆن لە ناوچەی پاسادینا زیانیان بەرکەوتووە.
لەو سکاڵایەی لە دادگا تۆمارکراوە، ئاماژە بەوە کراوە چەندین شایەتحاڵ بینیویانە ئاگرەکە لە ژێر تاوەرێکی گواستنەوەی کارەبا سەریهەڵداوە و ڤیدیۆکانیشی لە تۆڕەکانی کۆمەڵایەتیی بڵاوکراوەتەوە.
لەو هەواڵانەی لە ڕاگەیاندنی ئەمریکادا بڵاوکراونەتەوە، ڕەنگە ئەو سکاڵایەی دژی کۆمپانیاکە تۆمارکراوە، یەکەمین سکاڵای یاسایی بێت کە پەیوەست بە ئاگرکەوتنەوەکە تۆمارکراوە.
لە لایەکی دیکەوە، بەڕێوەبەری جێبەجێکاری کۆمپانیای ئەدیسۆن ئینتەرناشناڵ، پێدرۆ پیزارۆ لە دیمانەیەکیدا لەگەڵ CNBC جەختی لەسەر ئەوە کردەوە لە کاتژمێرەکانی پێش ئاگرکەوتنەوەی ئیتۆن لە ناوچەی لۆس ئانجلس هیچ دۆخێکی نائاسایی لە ئامێرەکانیاندا بەدینەکراوە.
لە ئاکامی ئەو ئاگرەی ئێوارەی حەوتی کانوونی دووەم لە ناوچە جیاوازەکانی لۆس ئانجلس کەوتەوە و بەکاریگەری توندەبا بەخێرایی تەشەنەی سەند تا ئێستا زیاتر لە 37 هەزار دۆنم زەوی سووتاندووە.
لەو ئاگرەدا 24 کەس گیانیان لەدەستدا و، نزیکەی 150 هەزار کەسیش گواستراونەتەوە بۆ شوێنی دیکە.
لەو کارەساتەدا زیاتر لە 12 هەزار خانوو و بینا زیانیان بەرکەوتووە یان بەتەواوی سووتاون.
کۆمێنت (0)
تا ئێستا هیچ کۆمێنتێک نەکراوە.