وەزارەتی شارەوانی و گەشتوگوزاری هەرێمی کوردستان ڕایگەیاند، بەمەبەستی چارەسەرکردنی گرفتی کەمئاوی و باشترکردنی پرۆسەی دابەشکردنی ئاوی خواردنەوە، پڕۆژەکانی ئاوی (پڕژە-چۆمان) و هەروەها ئاوی (بادلیان و دێلزیان) لە سنووری بەڕێوەبەرایەتیی ئاوی سۆران جێبەجێ دەکرێن.
سەبارەت بە پڕۆژەی چاککردنەوەی ئاوی پڕژە-چۆمان، وەزارەتەکە ئاماژەی بەوە کردووە کە پڕۆژەکە بریتییە لە دروستکردنی حەوزی کەمکردنەوەی پەستان (Pressure Reduction) و گۆڕینی بەشێک لە ڕێڕەوی بۆڕییەکان. بە تەواوبوونی ئەم پڕۆژەیە کە لەلایەن بەڕێوەبەرایەتیی ئاوی سۆران و فەرمانگەی ئاوی چۆمانەوە جێبەجێ دەکرێت، کێشەی ئاوی خواردنەوەی سەرجەم دانیشتوانی سەنتەری قەزای چۆمان چارەسەر دەبێت.
لە بەشێکی دیکەی ڕاگەیەندراوەکەدا هاتووە، قۆناغی یەکەمی پڕۆژەی ئاوی خواردنەوەی بادلیان و دێلزیان لە قۆناغی کۆتایی جێبەجێکردندایە و تا ئێستا ڕێژەی 90%ی کارەکانی پڕۆژەکە بە سەرکەوتوویی تەواو بووە. بە تەواوبوونی ئەم پڕۆژە ستراتیژییە، خزمەتگوزاریی ئاوی پاک بۆ دانیشتوانی هەردوو گوندی بادلیان و دێلزیان بە شێوەیەکی ڕاستەوخۆ دابین دەکرێت.
کۆمێنت (0)
تا ئێستا هیچ کۆمێنتێک نەکراوە.