قایمقامى ناوەنديی هه‌ولێر، داتا و زانیاریى و کار و چالاکییەکانی ساڵی 2024ى سنوورى قایمقامیەتى ڕاگەیاند.
ئەمڕۆ دووشەممە 2025/1/6، نەبەز عەبدولحەمید، قایمقامى ناوەنديی هەولێر، لە کۆنگرەیەکى ڕۆژنامەوانیدا بۆ کەناڵەکان، سەبارەت بە داتا و زانیاریى و کار و چالاکییەکانی سنوورى قایمقامیەت، تیشکى خستەسەر هەموو ئەو کارانەى کە لە ساڵی ڕابردوو 2024، لەلایەن لیژنەکانى قایمقامیەت بە هاوبەشى لەگەڵ فەرمانگە و لایەنەپەیوەندیدارەکان ئەنجامدراوە.
قایمقامی ناوەنديی ، سەبارەت بە کۆى گشتیى ئەو خۆراک و کاڵا بەسەرچووانەی کە لە ساڵی 2024 دا، لەلایەن لیژنەکانی قایمقامیەتەوە دەستی بەسەرداگیراوە، ڕایگەیاند: (105) تۆن دەرمان و (159) تۆن خۆراک بوون سەرجەمى بە گوێرەی ڕێنماییەکانی ژینگە لە ناو براون، گوتیشى، هەموو ئەو شوێن و جێگایانەشی وەک مارکێت، کۆگا، هۆتێل، خواردنگە، ئارایشتگا و چەندان شوێنی دیکە کە سەرپێچییان ئەنجامداوە و پابەندى ڕێنمایی تەندروستی نەبوونە و بەڵگەنامەی پێویستیان نەبووە داخراون.
ئاشکراشى کرد، ئەو تاقیگە، دەرمانخانە، نۆرینگە، سەنتەرە جوانکارییانەی کە لە ساڵی 2024دا داخراون، (234) شوێن بوونە، ڕاشیگەیاند: "سوپاس بۆ بازگەکان و هۆبەی ئابووری، کە بەردەوام لەگەڵ لیژنەکانی قایمقامییەت هاوکار و هەماهەنگ بوونە."
دووپاتیشیکردەوە، لیژنەکانى قایمقامیەت لەگەڵ کوالێتی کۆنترۆڵ بەردەوامن لە پشکنین بۆ دەرمانخانە و کۆمپانیاکانی دەرمان، بەراورد بە ساڵانی ڕابردوو، ئێستا ڕیژەی دەرمانی قاچاخ زۆر کەمى کردووە.
کۆمێنت (0)
تا ئێستا هیچ کۆمێنتێک نەکراوە.