دهوك.. پرۆسا دابه‌شكرنا (1048) پارچێن ئه‌ردی لسه‌ر زیندانیێن سیاسی وكه‌سوكارێن ئه‌نفالكریان ده‌ستپێكر

لدیف راسپاردێن "مه‌سرور بارزانی"سه‌روكێ حكومه‌تا هه‌رێما كوردستانێ, ئه‌ڤرۆ ڕۆژا سێشه‌مبی ڕێكه‌فتی 12ی چریا دوویێ یا 2024ێ ل هولا ڕێڤه‌به‌ریا گشتی یا باژێرڤانیان ب ئاماده‌بونا به‌رێز"د.عه‌لی ته‌ته‌ر"پارێزگارێ دهوكێ و "د.نه‌وزاد عه‌بدوللا"به‌رپرسێ لقێ ئێكێ پارتی دیموكراتی كوردستان و ئه‌ندازیار"دیار به‌حری "رێڤه‌به‌رێ گشتیێ باژێرڤانیان,د چارچوڤێ به‌رنامێ حكومه‌تا هه‌رێما كوردستانێ یێ دابه‌شكرنا پارچێن ئه‌ردی لسه‌ر ته‌خێن جودا یێن فه‌رمانبه‌ر و خانه‌نشیناندا وه‌كه‌ قوناغا ئێكێ پروسا دابه‌شكرنا (1048)هزار و چل و هه‌شت پارچێن ئه‌ردی ل سنورێ باژێرڤانیا فه‌یدیێ ب تیروپشك لسه‌ر زیندانیێن سیاسی و كه‌سوكارێن ئه‌نفالكریان ئه‌وێن به‌ری نوكه‌ ڕازه‌مه‌ندی هه‌ی ده‌ستپێكر 
به‌رێز پارێزگارێ دهوكێ د كونگره‌كێ ڕوژنامه‌ڤانیدا سوپاسیا رێزدار سه‌روكێ حكومه‌تا هه‌رێما كوردستانێ كر كۆ به‌رده‌وام دوڤچونا جێبه‌جێكرن و رێنمایێن ئه‌ڤێ پڕوسێ كریه‌ و پیروزباهی ل هه‌می وان كه‌سێن مفاداربوین كر و گوت د به‌رده‌وامیا پروسا دابه‌شكرنا پارچه‌ زه‌ڤیاندا هه‌ر دڤان روژاندا پتری 3500پارچێن ئه‌ردی ل سنورێن باژێرڤانیێن جودا دێ لسه‌ر فه‌رمانبه‌ر و خانه‌نشینان هێنه‌ دابه‌شكرن و هه‌ركه‌سێ رازه‌مه‌ندیا زویتر هه‌بیت دێ مفاداربیت,پارێزگارێ دهوكێ هه‌می رێڤه‌به‌ریێن د پڕوسێدا كاردكه‌ن ڕاسپاردن كۆ پڕوسه‌ ب ڕه‌نگه‌كێ شه‌فاف و دویری هه‌ر سه‌رپێچیه‌كێ بهێته‌ ب ڕێڤه‌برن و خواست وه‌لاتی د پێگری ڕێنمایان بن.