لە هەولێر رێژەی بەشداریكردن لە دەنگدانی تایبەت بەرزە

پڕۆسەی دەنگدانی تایبەت بۆ هەڵبژاردنی خولی شەشەمی پەرلەمانی كوردستان لە سنووری پارێزگای هەولێر زۆر بەباشی بەڕێوەدەچێت و رێژەی بەشداریكردنیش بەرزە.

لە كاتژمێر 7:00ی بەیانی پڕۆسەی دەنگدانی تایبەت بۆ هەڵبژاردنی خولی شەشەمی پەرلەمانی كوردستان لە هەولێر و پارێزگاكانی دیكەی هەرێمی كوردستان و ناوچە كوردستانییەكانی دەرەوەی ئیدارەی هەرێم و چەند پارێزگایەكی عێراق دەستی پێكرد.

كوردستان تیڤی بە نموونە رێژەی دوو كاتژمێری یەكەمی (تا كاتژمێر 9:00) بەشداریكردنی لە دوو بنكەی دەنگدان لە شاری هەولێر وەرگرتووە كە بەمشێوەی خوارەویە:-

بنكەی سامان لە گەڕەكی 32ی پاڕك.. لەماوەی دوو كاتژمێری یەكەمی هەڵبژاردن، رێژەی بەشداریكردنی هێزی پێشمەرگەی زێرەڤانی 25% بووە.

بنكەی كەرنەڤاڵ لە گەڕەكی بەختیاری.. لەماوەی دوو كاتژمێری یەكەمی هەڵبژاردن، رێژەی بەشداریكردنی 26% بووە.

پڕۆسەی دەنگدانی تایبەتی هێزە ئەمنییەكانی هەرێمی كوردستان تا كاتژمێر 6:00ی ئێوارە بەردەوامی دەبێت.

پێشتر كۆمیسیۆنی باڵای سەربەخۆی هەڵبژاردنەكانی عێراق رایگەیاندبوو كە بەهیچ شێوەیەك پڕۆسەكە درێژ ناكرێتەوە، چونكە دەنگدان بەشێوەی ئەلیكترۆنییە و لە كاتژمێر 6ی ئێوارە بەشێوەی ئەلیكترۆنی سەرجەم ئامێرەكانی دەنگدان رادەوەستن.