ئێواره‌ی ئه‌مڕۆ پێنجشه‌ممه 17/10/2024 له دهۆك نێچیرڤان بارزانی سه‌رۆكی هه‌رێمی كوردستان به‌شداری له ڕێوڕه‌سمی 29ـەمین خولی ده‌رچووانی زانكۆی دهۆك كرد كه ژماره‌یه‌ك له به‌رپرسانی حكوومه‌تی هه‌رێمی كوردستان و مامۆستایانی زانكۆ و كه‌سایه‌تییانی ئه‌كادیمی و كه‌سوكاری قوتابیانی ده‌رچوو تێیدا ئاماده بوون.
له ڕێوڕه‌سمه‌كه‌دا نێچیرڤان بارزانی وته‌یه‌كی پێشكه‌ش كرد، ئه‌مه ده‌قه‌كه‌یه‌تی:
مامۆستا و مالباتێت ده‌رچوويا يێت ڕێزدار،
مێهڤان و ئاماده‌بوويێت هێژا..
ئێڤارا وه ب خۆشی،
هوين هه‌مى گه‌له‌ك بخێر هاتن..
جهێ خۆشحالييه‌كا زۆره كو ئه‌ڤرۆ پێكڤه دگه‌ل خۆشى و شادييا (5,051) گه‌نجێت مه يێت خۆشتڤى، يێت (19) به‌شێت كۆلێژێت جدا، ده‌رچوويێت ده‌ورا (29)ێ يا زانكۆيا دهۆكێ، یێ به‌شدارم.
ده‌رچوويێت هێژا،
ژدل، ئو بگه‌رمى، پيرۆزباهيێ ل هه‌وه، ل مالبات و مامۆستايێت هه‌وه يێت ڕێزدار دكه‌م. هيڤيا سه‌ركه‌فتنێ بۆ وه هه‌ميا دخازم. ئه‌ڤ ئێڤارييه نه بتنێ ئاهه‌نگا ده‌رچوونێ، بۆ وه به‌لكى قۆناغ و ده‌سپێكه‌كا نوييه بۆ كاروانێ هه‌وه د ژیانێدا.
هه‌وه چه‌ندين سالێت كاره‌كێ جددى و خويندن و وه‌ستيانێ ل زانكۆيێ ئه‌ڤرۆ ده‌رباز كرن. هه‌وه گه‌له‌ك زه‌حمه‌تى كێشان، داكو سه‌ركه‌ڤن، داكو خه‌ونێت خۆ بكه‌نه ڕاستى و بگه‌هنه ئارمانجێت خۆ.
وه‌رگرتنا باوه‌ڕنامێ ل زانكۆيا دهۆكێ، ده‌سكه‌فته‌كێ جهى شانازى و سه‌ربلنديێيه. به‌لێ ژبير نه‌كه‌ن، باوه‌ڕنامه نه بتنێ نيشانا سه‌ركه‌فتنا هه‌وه يا پيشه‌يى و ئه‌كاديمييه، ئه‌ڤ باوه‌ڕنامه‌یه به‌رپرسيارييه‌كا مه‌زنه دكه‌ڤيته سه‌ر ملێ هه‌وه، داكو زانست و زانينا هه‌وه هون فێر بووی، بۆ خزمه‌تا جڤاكێ و ئاڤاكرنا پاشه‌ڕۆژه‌كا باشتر و گه‌شتر، بۆ ولاتێ خۆ بكار بينن.
هه‌وه د گه‌له‌ك وارێت جدادا، خويندنه‌كا باش يا كرى. هوين گه‌له‌ك زانين و زانستێت نوى يێت فێر بووى، وه‌كى زانستێت مرۆڤى، سروشتى، ئه‌ندازيارى، پزيشكى، ئاى تى، بڕێڤه‌برن و گه‌له‌ك وارێت دى یێت كو ئه‌ڤرۆ لێره‌دا هون ئاماده بووی.
ئه‌ڤه ڕێيه‌كه بۆ هندێ بشێن به‌رامبه‌ر ته‌حه‌ديا ئه‌وێت ل پێشییا مه، ئه‌وێت ل پێشییا هه‌وه ڕاوه‌ستن، چاوانييا چاره‌سه‌ركرنا وان كێشه و ئاريشا ڤه‌بينن يێت كو تێنه سه‌ر ڕێكا وه‌لاتێ مه، تێنه سه‌ر ڕێكا جڤاكێ مه.
قوتابی یێت خۆشتڤی..
دنيا گه‌له‌ك بله‌ز يا دهێته گهۆڕين، دڤێت هون د ئاستێ پێویست و ته‌حه‌ددی یێت ئه‌ڤرۆدا بن.
ده‌رچوويێت خۆشتڤى،
د جيهانا ئه‌ڤرۆ يا تژى ئاڵۆزى و ته‌حه‌ديدا، وه‌لات و جڤاك، گه‌له‌ك پێدڤى وان كه‌سایه یێت زيره‌ك و ژێهاتى و ده‌سپێشخه‌ر، يێت كو بشێن هزره‌كا ڕه‌خنه‌گرانه و بنياتنه‌ر بكه‌ن بۆ چاره‌سه‌رێت نوى يێت زانستى و داهێنه‌رانه، يێت سه‌ركه‌فتى و سه‌رده‌ميانه، بۆ كێشه و ئاريشێت جدا، ڕێكا چاره‌سه‌ریێ ڤه‌بينن. نۆكه هوين، يێ د وى پێگه‌هيدا كو بشێن جداهييه‌كێ چێكه‌ن.
نه بتنێ د وارێ خويندنێدا يا پيشه‌يى و ئه‌كاديمی، به‌لكى دڤێت هوين بشێن د وارێ ژيانا جڤاكى، كولتوورى، ئابوورى، كارگێڕى و سياسى يا كوردستانێدا ژى، جداهيێ چێكه‌ن.
ل كوردستانێ و عێراقێ د چه‌ندين وارادا، گه‌له‌ك ته‌حه‌دى يێت جدا يێن جڤاكى و ئابوورى هه‌نه. دڤێت هوين بزانن كو ده‌رچوويێت زانكۆيێ، دشێن ڕۆله‌كێ گرنگ بۆ چاره‌سه‌ركرنا وان بگێڕن. ئه‌ڤه ژى بڕێكا داهێنانێ د وارێ كار و بزنسێدا، هه‌روه‌سا ب به‌شداريا هه‌وه بۆ پێشئێخستنا به‌رنامه و ستراتيژ و سياسه‌تا گشتى.
قوتابی یێت خۆشتڤی ژبير نه‌كه‌ن:
هوين هيڤيا ڤى ملله‌تينه بۆ پاشه‌ڕۆژه‌كا گه‌شتر، ژبه‌ر هندێ ژى ئه‌ركێ هه‌وه، یێ بساناهی نییه، ئه‌ركێ هه‌وه يێ گرانه بۆ خزمه‌تكرنا پاشه‌ڕۆژا ملله‌تێ مه.
وه‌لاتێ مه، گه‌له‌ك نه‌خۆشى و كاره‌سات و كێشه و قه‌يرانێت ديتى. گه‌له‌ك گرنگه ئه‌م هه‌مى پێكڤه كار بكه‌ين بۆ ئاڤاكرنا جڤاكه‌كێ تژى ڕێزگرتن و دادپه‌روه‌ر و وه‌كهه‌ڤ.
هوين دێ به‌ره‌ڤ ئاسۆیه‌كا نوى چن، ژبه‌ر هندێ خۆ ئاماده بكه‌ن بۆ پێكئينانا ئارمانجێت خۆ يێت مه‌زن ئو یێت بلند. هه‌رگاڤ شانازيێ ب خزمه‌تا خۆ بۆ ملله‌تێ خۆ، شانازيێ ب خزمه‌تا خۆ بۆ وه‌لاتێ خۆ بكه‌ن. به‌رپرسيارييا كو دكه‌ڤيته سه‌ر ملێ هه‌وه، گه‌له‌كا مه‌زنه. مه ژى هه‌مى باوه‌رييا ب هه‌وه هه‌ى، كو دێ د ئه‌ركێ خۆ به‌رامبه‌ر ئه‌و ته‌حه‌ددياتێت كو دهێنه پێش ملله‌تێ مه و وه‌لاتێ مه، دێ ب سه‌ركه‌فتی و سه‌رفه‌رازی جیبجی كه‌ن.
ئاماده‌بوويێت هێژا،
مامۆستا و ده‌رچوويێت خۆشتڤى،
په‌روه‌رده و فێركرن، بناغێ سه‌ره‌كى يێ پێشكه‌فتنا هه‌ر جڤاكه‌كێ یه، هه‌ر جڤاكه‌كا ساخله‌می بڤێت، پێشكه‌فتن بڤێت، كلیلا وێ ل په‌روه‌ردێ ده‌ستپێدكه‌ت. زانست و زانين، شه‌رتێ ئێكێ يێ سه‌ركه‌فتنا هه‌ر ملله‌ته‌كى يه، به‌رێ خۆ بده‌نه دونیایێ، ئه‌و ملله‌تێت ڕێكا په‌روه‌ردێ هه‌لبژاردبیت بۆ پێشكه‌فتنا جڤاكا خۆ، گه‌له‌ك ب سه‌ركه‌فتی یێت هاتییه پێش، وه‌لات یێ هه‌بووی یێ د هه‌ژاریێدا بووی، یێ د زه‌حمه‌تیێدا بووی، به‌لێ وه‌ختێ په‌روه‌رده كرییه ئه‌وله‌ویه‌تا كارێ خۆ، وه‌لاتێ خۆ ل هه‌ژاریێ ئینا ده‌ر و ئه‌ڤرۆ ئه‌م دبینین ئێكن ل پێشكه‌فتیترین وه‌لاتێت دونیایێ.
دڤێت به‌رده‌وام دگه‌ل نووترین پێشكه‌فتنێت زانستی یێت جیهانێ خۆ نووڤه‌كه‌ن، دڤێت بها و گرنگييه‌كا دروست بده‌نه هه‌مى وان بابه‌ت و وارێت كو ئه‌ڤرۆ ل جيهانێ جهێ گرنگى و سه‌رنجێنه. دڤێت ئه‌م هه‌مى هه‌ولا بده‌ين كو ڤێڕا بگه‌هين و ژ كاروانێ ئه‌ڤرۆ یێ پێشكه‌فتنێ يێ د جيهانێدا ئه‌م ل پاشڤه نه‌مينين.
له‌وما پێدڤييه زانكۆيێت مه، گرنگييه‌كا دروست بده‌نه ته‌كنه‌لۆژيايێ و بكارئينانا وێ د هه‌مى وارێت ژيانێدا. گرنگييه‌كا پێويست بده‌نه زيره‌كييا ده‌ستكرد و گه‌له‌ك باش لسه‌ر ده‌رفه‌ت و مه‌ترسيێت وێ يێت نۆكه و پاشه‌ڕۆژێ ڕاوه‌ستن. دڤێت بابه‌تێ گهۆڕينا ئاڤوهه‌واى و چاوانييا چاره‌سه‌رى و كێمكرنا مه‌ترسيێت وێ، گه‌له‌ك ب جددى بێنه وه‌رگرتن و كار بۆ بێته كرن. ژبیر نه‌كه‌ن عێراق ب شكله‌كێ گشتی ئێك ژ وان ده‌وله‌تایه كو پرسا ئاڤوهه‌وای باندۆره‌كا گه‌له‌ك یا مه‌زن لێكریه.
پێويسته گرنگييه‌كا به‌رده‌وام و تايبه‌ت بده‌نه ناڤه‌ندێت لێكۆلينا زانستى و، هاريكارى د ناڤبه‌را زانكۆيێت كوردستانێ و عێراقێ و جيهانێدا زێده‌تر بكه‌ن. زانكۆێت مه پێدڤیه به‌شه‌كێ دانه‌بڕياى بن ل زانكۆ و ناڤه‌ندێت زانستى يێت جيهانێ.
هه‌روه‌سا گرنگييه‌كا جددى بده‌نه زانستێت مرۆڤى، ئاڤاكرن و پێشڤه‌برنا شيانێت مرۆڤى و خورتكرنا ڤيان و ئينتيمايا گه‌نج و لاوێت مه، بۆ وه‌لات و ملله‌تێ خۆ، ئه‌ڤه بنگه‌ها پێشكه‌تنا هه‌ر ملله‌ته‌كی یه.
لدويماهيێ،
ديسا پيرۆزباهيێ ل ده‌رچوويا و سپاس و پێزانينه‌كا تايبه‌ت پێشكه‌شى سه‌رۆكاتى و ده‌سته‌يا مامۆستايێت زانكۆيا دهۆكێ دكه‌م. هه‌وه خزمه‌ته‌كا زۆرا كرى، زه‌حمه‌ت و ئه‌ركه‌كێ زۆرێ كێشاى بۆ پێگه‌هاندنا ڤان ده‌رچوويێت خۆشتڤى یێت ئه‌ڤرۆ، ئه‌ز ب گه‌رمی ب ناڤێ خۆ و ب ناڤێ هه‌میا پیرۆزباهی و ده‌ستخۆشییه‌كا گه‌رم ل وه هه‌میا دكه‌م. هه‌روه‌سا پشته‌ڤانى و ده‌ستخۆشيێ ل هه‌ولێت زانكۆيا دهۆكێ دكه‌م بۆ دامه‌زراوه‌ييكرنا زانكۆيێ و بلندكرنا كواليتييا خويندنێ ل زانكۆیا دهۆكێ، بێ شك ئه‌ڤرۆ سال ب سال جیێ ده‌ستێ وه دیاره، ئه‌ز پیرۆزباهیێ ل وه دكه‌م و هيڤيا سه‌ركه‌فتنێ ژی د ڤی بواریدا بۆ هه‌وه داخواز دكه‌م ب ئانه‌هیا خودێ.
قوتابی یێت خۆشتڤی ب ناڤێ وه و ب ناڤێ خۆ و ب ناڤێ هه‌میا سوپاس و ده‌ستخۆشییه‌كا گه‌رم بۆ دايكوباب و مالبات و كه‌سوكارێت هه‌وه، یێت هه‌وه ده‌رچۆییا كو گاڤ ب گاڤ، به‌رده‌وام پشته‌ڤان و هاريكارێت هنگۆ بووينه، داكو كچ و كوڕێت وان، بشێن خويندنا خۆ يا زانكۆيى بدويماهى بينن، ئه‌ز ب ناڤێ وه سپاسییه‌كا گه‌رما وان دكه‌م. وه‌ستيانا مالباتێت وه دگه‌ل هنگۆ و قوربانيدان و پشتگيرييا وان، جهێ ڕێز و پێزانينه‌كا زۆره.
ده‌رچوويێت خۆشتڤى،
گه‌نجێت هێژا و ده‌لال،
ژبير نه‌كه‌ن، هوين ئومێد و پاشه‌ڕۆژا كوردستانێنه. باب و باپيرێت هه‌وه، ب گيان و خوينا خۆ، ب خه‌بات و قوربانيیا خۆ، كوردستان پاراست، ئه‌ڤرۆ ژى ئه‌و ئه‌مانه‌ت كو وه‌لاته، ئه‌ڤ ملله‌ته‌یه، یێ د ده‌ستێ هه‌وه‌دا، كوردستان ئه‌مانه‌تى هه‌وه‌يه. هيڤييا سه‌ركه‌فتن و پێشكه‌فتنا به‌رده‌وام بۆ هه‌وه هه‌ميا دخازم.
بۆ ئاڤاكرنا جڤاكه‌كا سه‌ركه‌فتى، جڤاكه‌كا پێشكه‌فتی يا تژى هيڤى و شكۆمه‌ندى. يێ كو ب ئومێده‌كا مه‌زن به‌رێ خۆ دده‌ته پاشه‌ڕۆژه‌كا گه‌شتر، هیڤیا من ئه‌وه هون ئه‌و بن وی ئالای هه‌لگرن و كوردستانێ ل ڤێ قۆناغێ به‌ره‌ڤ قۆناغه‌كا گه‌شتر ببه‌ن، مه ئومێد یا ب هه‌وه هه‌ی و هیڤیدارین هون بزانن ئه‌ڤ ئه‌مانه‌ته یێ لسه‌ر ملێ هه‌وه و هیڤیدارم به‌رده‌وام د سه‌ركه‌فتنێ و پێشكه‌فتنێدا بن.
سلاڤ ل گيانێ پاقژێ شه‌هيدێت كوردستانێ، كو ئه‌ڤرۆ ب سايا سه‌رێ وان و خوینا وان شه‌هیدا، كوردستان يا ئازاد و یا سه‌فه‌رازه و دێ یا سه‌رفه‌راز مینیت.
هه‌ر هه‌بن، هه‌ر شاد بن.
گه‌له‌ك سپاس بۆ وه هه‌میا، هيڤييا ئێڤارييه‌كا خۆش بۆ هه‌وه داخاز دكه‌م. دیسا پیرۆزبیت ل وه هه‌میا و سه‌ركه‌فتی بن، ته‌مه‌ندرێژ بن د ژیانێدا.
ب خێر بێن سه‌ر چاڤا.
کۆمێنت (0)
تا ئێستا هیچ کۆمێنتێک نەکراوە.